Awafango-ngbanga 21 - Mbeti ti Nzapa - Tënë so amu fini

Mara ti Benjamin akiri ti wu

¹ Kâ na Mispa, azo ti Israel adeba yanga ti ala lani, atene: “Fade mbeni zo oko na popo ti e ayeke mu molenge ti lo pepe na zo ti mara ti Benjamin ti ga wali ti lo!”

² Azo ti kodro ni kue akiri ague na Betel, ala duti kâ na dawa ti *KOTA GBIA ngbii asi na lakui. Ala dekongo si ala toto mingi.

³ Ala tene: “KOTA GBIA, Nzapa ti Israel, ngbanga ti nyen laa ye tongaso asi na Israel? Ngbanga ti nyen laa mbeni mara oko ti Israel ayeke daa mbeni pepe so?”

⁴ Lango oko na pekoni, so ndo angba kâ, azo ti Israel alondo, ala leke mbeni gbalaka na ndo ni so. Ala mu *sandaga so a yeke gbi ni kue na wâ nga na sandaga ti beoko.

⁵ Na pekoni, azo ti Israel ahunda ndo na popo ti ala, atene: “Na popo ti amara kue ti Israel, zo wa laa aga na bongbi na dawa ti KOTA GBIA so pepe?” Biani, ala kue adeba yanga atene, fade a yeke fâ zo so ake ti ga na bongbi na dawa ti KOTA GBIA na Mispa.

⁶ Andaa azo ti Israel abaa mawa ti a-ita ti ala, azo ti Benjamin si ala tene: “Mbeni mara oko na popo ti e ayeke gue ti girisa girisango.

⁷ Fade e yeke sara tongana nyen ti wara awali ndali ti akoli ti Benjamin so angba na fini so? Ngbanga ti so e deba yanga lani na iri ti KOTA GBIA, e tene, e yeke mu amolenge ti e na ala pepe ti ga wali ti ala!”

⁸ Azo ti Israel atene: “Na popo ti amara ti Israel, mara wa laa ade ti ga na dawa ti KOTA GBIA na Mispa pepe?” Andaa zo oko ti gbata ti Yabesh, na sese ti Galaad aga pepe na ya ti bâbâ ni na ngoi ti bongbi ni so.

⁹ A diko wungo ti azo ti Israel, me zo ti Yabesh oko ayeke na popo ti ala pepe.

¹⁰ Nilaa bongbi ti azo ni atokua angangu turugu saki baleoko na use na gbata ti Yabesh. Ala mu yanga, atene: “Ala gue, afâ azo ti Yabesh, na sese ti Galaad; ala fâ akoli, awali na amolenge kue.

¹¹ Baa ye so ala yeke sara laa: fade ala yeke fâ akoli kue kue kue nga awali so kue ahinga koli awe.”

¹² Na popo ti azo ti Yabesh kue, ala wara amolenge-wali ngbangbo osio so ade ti hinga koli pepe. Ala mu amolenge-wali ni si ague na ala na bâbâ ti Silo, na sese ti Kanaan.

¹³ Na pekoni, bongbi ti azo ti Israel atokua azo na azo ti Benjamin so ayeke na tere ti kota têne ti Rimon ti tene tënë ti siriri na ala.

¹⁴ Biaku, azo ti Benjamin akiri na ndo ti ala. A mu na ala awali so a fâ ala lani pepe na Yabesh. Me awali ni alingbi na akoli ni kue pepe.

¹⁵ Azo ti Israel abaa mawa ti azo ti Benjamin, ngbanga ti so KOTA GBIA azi lani mbeni mara oko na popo ti amara ti Israel.

¹⁶ *Akangba ti bongbi ti azo ti Israel kue atene: “Nyen laa e yeke sara titene akoli so angba na fini awara awali? So a fâ awali ti mara ti Benjamin kue awe so.”

¹⁷ Ala kiri atene: “Alingbi azo ti Benjamin adu amolenge si na popo ti amara ti Israel kue, mbeni mara oko ahunzi pepe.

¹⁸ Me ti e, e lingbi ti mu amolenge ti e na ala pepe ti ga awali ti ala, ngbanga ti so e deba yanga ti e lani, e tene: ‘Deba aga na ndö ti zo so amu molenge ti lo na mbeni koli ti mara ti Benjamin ti ga wali ti lo!’ ”

¹⁹ Tongaso ala tene: “Na ngu oko oko, a yeke sara matanga ti KOTA GBIA na kodro ti Silo so ayeke na Banga ti Betel, na To ti lege so alondo na Betel ti gue na Sishem, nga na Mbongo ti Lebona.”

²⁰ Na pekoni, ala mu yanga na azo ti Benjamin, atene: “Ala gue, ahonde tere ti ala na ya ti ayaka ti *vinye.

²¹ Ala duti kâ ti baa ndo. Tongana ala baa amolenge-wali ti kodro ti Silo so ayeke sigigi ti dodo na ndembe ti matanga ni, fade ala sigigi na ndo so ala honde tere ti ala daa so. Zo oko oko ayeke gbu molenge-wali ti Silo oko ague na lo na sese ti Benjamin si lo ga wali ti lo.

²² Tongana ababâ ti amolenge-wali ni wala a-ita ti ala ti koli aga ti bi tënë na li ti e, fade e yeke tene na ala, e tene: ‘Ala sara nzoni be na azo ti Benjamin si. Biani, na ngoi ti bira ti Yabesh, e wara lege pepe ti mu wali na ala oko oko kue. So ala wani laa amu awali na azo ti Benjamin pepe so, tënë ti deba ayeke na ndö ti ala pepe.’ ”

²³ Azo ti Benjamin asara ye alingbi gi na wango so a mu na ala: na popo ti awali so aga ti dodo, ala gbu ambeni alingbi gi na wungo ti ala. Ala mu awali ni, ague na ala na sese so a mu na ala titene aga ti ala. Ala kiri aleke agbata ti ala si ala duti daa.

²⁴ Na ndembe ni so, azo ti Israel oko oko kue alondo na ya ti bongbi ni; zo oko akiri na ya ti mara ti lo, na ya ti kete mara ti lo nga na sese so a mu na lo titene aga ti lo.

²⁵ Na ngoi ni so, gbia ayeke na Israel pepe. Zo oko oko ayeke sara gi ye ti be ti lo.