Awafango-ngbanga 20 - Mbeti ti Nzapa - Tënë so amu fini

Israel asara bira na azo ti Benjamin

¹ Azo ti Israel kue abongbi tere tongana zo oko na dawa ti *KOTA GBIA na sese ti Mispa. Ala londo na sese ti Dan ngbii ala si na Bersheba nga na Galaad.

² Amakonzi ti azo ni kue, na amara ti Israel kue aga na ya ti bongbi ti azo ti Nzapa so: aturugu saki ngbangbo osio, ala so ahinga ti tiri bira na yongoro zeme.

³ Azo ti mara ti Benjamin ama a tene, azo ti Israel asi na Mispa. Azo ti Israel ahunda ndo, atene: “Ala fa na e peko ti fango zo so a fâ lo so.”

⁴ Zo ti mara ti Lévi, lo so azo afâ wali ti lo so amu tënë, atene: “Mbi na mbeni wali ti mbi, e si na Gibea, na sese ti Benjamin titene e lango kâ.

⁵ Azo ti Gibea alondo na tere ti mbi na bi, ala ngoro tere ti da so mbi lango daa, ala ye ti fâ gi mbi. Me ala mu wali ti mbi, ala lango na lo ngbii lo kui.

⁶ Mbi mu kuâ ti wali ti mbi, mbi fâ ya ni mbi tokua na sese ti Israel kue. Biani, azo ni asara ye ti sioni so zo alingbi ti baa na le ti lo fani use pepe, ala sara ye ti buba na sese ti Israel.

⁷ Fadeso, ala azo ti Israel kue laa ge so: ala ma tere, ala fa ye so ala lingbi ti sara!”

⁸ Azo ni kue alondo tongana zo oko, ala tene: “Zo oko na popo ti e ayeke kiri na ndo ti lo pepe, zo oko ayeke kiri na da ti lo pepe.

⁹ Baa, ye so e yeke sara ndali ti Gibea laa: e yeke bi mbeni ye ti hinga lege so e yeke sara na Gibea.

¹⁰ Na popo ti amara ti Israel kue, e yeke mu azo baleoko na popo ti azo ngbangbo oko, azo ngbangbo oko na popo ti azo saki oko, azo saki oko na popo ti azo saki baleoko. Azo ni ayeke gue ti gi kobe ti ga na ni na azo so ayeke gue ti sara na azo ti Gibea alingbi na sioni so ala sara na azo ti Israel.”

¹¹ Tongaso laa azo ti Israel kue abongbi tongana zo oko ti tiri bira na azo ti Gibea.

¹² Amara ti Israel atokua azo na sese ti Benjamin kue ti hunda ndo, atene: “A sara mara ti sioni tongaso na ndo ti ala ngbanga ti nyen?

¹³ Ala zia na maboko ti e agodobe ti Gibea so asara ye ni so titene e fâ ala, tongaso si e zi sioni sarango ye na popo ti azo ti Israel.” Me azo ti Benjamin ake ti ma yanga ti a-ita ti ala, azo ti Israel.

¹⁴ Azo ti Benjamin alondo na ya ti agbata ti ala nde nde, ala bongbi na Gibea titene ala tiri na azo ti Israel.

¹⁵ Na lango ni so, azo ti Benjamin so alondo na agbata nde nde si aga, a diko ala, wungo ti ala kue ayeke saki baleuse na omene; ala kue ayeke azo so ahinga ti sara bira na yongoro zeme. Na ndö ni kue, aturugu ti Gibea ayeke daa, wungo ti ala ayeke ngbangbo mbarambara, ala kue ayeke akpengba zo ti bira.

¹⁶ Na popo ti aturugu so kue, akpengba zo ti bira ngbangbo mbarambara ayeke daa so ayeke sara ye gi na maboko ti ala ti wali. Tongana ala oko oko azia têne na ya ti *mvingi ti bo na kua ti li oko, têne ni ayeke hon nde pepe.

¹⁷ A diko nga azo ti Israel, a zia azo ti Benjamin daa pepe: wungo ti azo ti Israel ni kue ayeke saki ngbangbo osio. Ala kue ayeke aturugu so ahinga lege ti sarango bira nzoni.

¹⁸ Azo ti Israel ague na Betel ti hunda Nzapa: “Mara wa na popo ti e ayeke londo kozoni ti tiri na azo ti Benjamin?” KOTA GBIA akiri tënë na ala: “Mara ti Juda laa ayeke londo kozo!”

¹⁹ Azo ti Israel alondo na kota ndaperere, ala gue, asara bâbâ ti ala nduru na Gibea.

²⁰ Ala sigigi ti gue ti sara bira na azo ti Benjamin. Azo ti Israel aleke tere na ndo so abaa le na Gibea ti sara bira ni.

²¹ Azo ti Benjamin alondo na Gibea asigigi si ala fâ azo ti Israel saki baleuse na use na lango ni so.

^22-23 Azo ti Israel ni ague, atoto na dawa ti KOTA GBIA ngbii asi na lakui. Ala hunda KOTA GBIA, atene: “E kiri e gue, e sara bira na azo ti Benjamin, a-ita ti e?” KOTA GBIA akiri tënë na ala: “Ala gue, atiri bira senge!” Tongaso, be ti ala akiri awara ngangu si ala leke tere ti ala na oko ndo so ala duti daa na kozo lango ni so ti sara bira.

²⁴ Azo ti Israel akiri ague ti sara bira na azo ti Benjamin na use lango ni.

²⁵ Na use lango ni so, azo ti Benjamin alondo na Gibea ala sigigi, ala kiri afâ azo ti Israel saki baleoko na miombe, kue gi azo so ahinga ti sara bira na yongoro zeme.

²⁶ Tongaso, azo ti Israel kue amu lege ague na Betel. Kâ, ala duti ti toto na dawa ti KOTA GBIA, ala ke kobe ngbii asi na lakui. Ala mu na KOTA GBIA *sandaga so a yeke gbi ni kue na wâ nga na sandaga ti beoko.

²⁷ Na pekoni azo ti Israel ahunda KOTA GBIA. Andaa na ngoi ni so, sanduku ti *mbuki ti Nzapa ayeke na Betel.

²⁸ Pinas, molenge ti Elazar, molenge ti Aaron laa ayeke bata sanduku ni. Azo ti Israel atene: “Fade e kiri e sara bira na azo ti Benjamin, a-ita ti e? Wala e zia lege ni?” KOTA GBIA akiri tënë na ala: “Ala gue senge, ngbanga ti so kekereke, mbi yeke zia azo ti Benjamin na maboko ti ala.”

²⁹ Azo ti Israel ahonde aturugu angoro Gibea kue.

³⁰ Na lango ota ni, azo ti Israel ague ti sara bira na azo ti Benjamin, ala leke tere ti ala tongana ti kozoni.

³¹ Azo ti Benjamin asigigi ti tiri bira na azo ti Israel, azo ti Israel ahanda ala si ahon yongoro na kodro ti ala. Azo ti Benjamin ato nda ti fâ ambeni zo ti Israel tongana ti kozoni na ndö ti lege ti guengo na Betel nga na ndö ti lege ti guengo na Gibea; ala fâ azo ti Israel baleota.

³² Azo ti Benjamin atene na be ti ala: “Ti laso, e kinda ala tongana ti kozoni.” Andaa azo ti Israel aleke tënë na be ti ala kozoni, atene: “E kpe, e handa ala titene ala zia gbata ni asigigi na ndö ti alege ti gue yongoro na peko ti e.”

³³ Azo ti Israel kue alondo na ndo so ala honde tere ti ala daa, ala gue, aleke tere ti ala na Baal-Tamar. Ala so ahonde tere ti ala na ya ti ngonda nduru na gbata ni alondo na lando ti Gibea asigigi.

³⁴ Tongaso akpengba turugu saki baleoko so ayeke ti azo ti Israel kue asi na ndo so abaa le na Gibea. Bira alondo ngangu, me azo ti Benjamin ahinga fade pepe atene, kpale ayeke ti na ndö ti ala.

³⁵ KOTA GBIA akinda azo ti Benjamin na dawa ti azo ti Israel. Azo ti Israel afâ azo ti Benjamin saki baleuse na oku na ngbangbo oko na lango ni so; azo ni kue ayeke azo so ahinga ti tiri bira na yongoro zeme.

³⁶ Azo ti Benjamin ahinga atene, a kinda ala awe. Andaa azo ti Israel azia ndo na azo ti Benjamin, ngbanga ti so ala zia be ti ala na ndö ti amba ti ala so ahonde tere ti ala na ya ti ngonda, nduru na Gibea.

³⁷ Azo so ahonde tere ti ala na ya ti ngonda so alondo hio amu lege ti Gibea. Ala kangbi tere ti ala na ya ti gbata ni kue si ala fâ azo ni kue.

³⁸ Azo ti Israel na ala so ahonde tere ti ala na ya ti ngonda ama tere tongaso: fade ala so ahonde tere ti ala na ya ti ngonda ayeke sara wâ si guru ni ayeke londo na nduzu na ndö ti gbata ni.

³⁹ Azo ti Israel akiri na peko na ya ti bira ni. Azo ti Benjamin afâ azo ti Israel nduru na baleota. Tongaso azo ti Benjamin abaa ti ala atene, fade ani yeke kinda azo ti Israel tongana ti kozoni.

⁴⁰ Andaa na ngoi ni so, ngbongboro guru ti wâ ato nda ti londo na nduzu na ndö ti gbata ni. Tongana azo ti Benjamin abaa ndo na peko, ala baa gi menga ti wâ laa ayeke londo na ya ti gbata ni kue si ayeke gue na nduzu.

⁴¹ Azo ti Israel akiri na tere ti azo ti Benjamin. Mbeto agbu azo ti Benjamin mingi, ngbanga ti so ala baa kpale so ayeke ti na ndö ti ala.

⁴² Ala kpe na dawa ti azo ti Israel si ala mu lege ti guengo na benyama. Me aturugu ti Israel angoro ala mbage na mbage si ambeni turugu so asigigi na ya ti agbata afâ ala mingi.

⁴³ Azo ti Israel angoro azo ti Benjamin; ala tumba peko ti ala, ala sara sana na ala ngbii asi nduru na Gibea, na mbage ti To.

⁴⁴ Azo ti Benjamin saki baleoko na miombe akui; ala kue gi angangu turugu.

⁴⁵ Ambeni zo ti Benjamin akpe na mbage ti benyama, na lege ti kota têne ti Rimon; a fâ azo saki oku na popo ti ala na ndö ti alege. A tumba peko ti ambeni ngbii asi na Gidom; a fâ ambeni saki use.

⁴⁶ Wungo ti azo ti Benjamin so kue a fâ ala na lango ni so ayeke saki baleuse na oku; ala kue ayeke angangu turugu.

⁴⁷ Azo ngbangbo omene akpe na mbage ti benyama, na lege ti kota têne ti Rimon; ala duti kâ nze osio.

⁴⁸ Azo ti Israel akiri na tere ti tanga ti azo ti Benjamin so angba. Ala tambula na ya ti agbata ni kue, ala fâ azo, anyama nga na aye so kue ala wara. Ala bi wâ daa na ya ti agbata so kue ala wara.