Awafango-ngbanga 13 - Mbeti ti Nzapa - Tënë so amu fini

Dungo Samson

¹ Azo ti Israel akiri asara ye so ayeke sioni na le ti *KOTA GBIA; tongaso lo zia ala na maboko ti azo ti Filistii na ya ti ngu baleosio.

² Mbeni koli ti mara ti Dan ayeke daa; lo yeke lango na Sora. Iri ti lo ayeke Manoa; wali ti lo adu pepe, lo yeke wali ti dungo ni pepe.

³ Mbeni lâ, *ange ti KOTA GBIA asi na wali ni si atene na lo: “Mbi hinga, mo yeke na molenge pepe, ngbanga ti so mo yeke wali ti dungo ni pepe. Me fade mo yeke mu ngo si mo yeke du molenge-koli.

⁴ Ti londo na lango ti laso, mo sara hange: mo nyon vin wala mbeni ngangu samba pepe, mo te nga pepe akobe so ayeke *sioni,

⁵ ngbanga ti so mo yeke mu ande ngo si mo yeke du molenge-koli. Fade a yeke fâ kua ti li ti molenge ni pepe, lo yeke duti nazir, gi na ndembe so lo de na ya ti mama ti lo. Lo laa lo yeke to nda ti soo azo ti Israel na maboko ti azo ti Filistii.”

⁶ Wali ni ague si atene na koli ti lo: “Mbeni zo ti Nzapa aga na tere ti mbi, lo kpa ange ti Nzapa. Le ti lo amu mbeto mingi na zo. Mbi hunda ndo so lo londo daa si lo ga pepe; lo fa nga na mbi iri ti lo pepe.

⁷ Me lo tene na mbi: ‘Fade mo yeke mu ngo si mo yeke du molenge-koli, mo yeke nyon vin wala ngangu samba pepe, mo yeke te kobe so ayeke *sioni pepe, ngbanga ti so molenge ni ayeke duti nazir, gi na ndembe so lo de na ya ti mo ngbii asi na lango ti kuâ ti lo.’ ”

⁸ Tongaso, Manoa asambela KOTA GBIA, lo tene: “KOTA GBIA, mbi gbu gere ti mo, zia zo ti Nzapa so mo tokua lo so akiri aga na tere ti e titene lo fa na e ye so e lingbi ti sara na molenge-koli so e yeke du ande so.”

⁹ Nzapa ama sambela ti Manoa. Tongaso ange ti Nzapa akiri aga na tere ti wali ni na ndembe so wali ni ayeke na yaka; koli ti lo ayeke daa pepe.

¹⁰ Wali ni amu loro hio, lo gue, lo tene na koli ti lo: “Koli so aga lani abaa mbi so, lo kiri lo ga awe.”

¹¹ Manoa amu peko ti wali ti lo, lo gue, lo wara koli ni, lo tene na lo: “Mo laa mo tene tënë na wali so?” Lo kiri tënë: “Mbi laa!”

¹² Manoa atene na lo: “Tongana tënë so mo tene so asi, nyen laa e lingbi ti sara ndali ti molenge ni, nyen? Ndia ti nyen laa e lingbi ti bata ndali ti lo?”

¹³ Ange ti KOTA GBIA akiri tënë na Manoa: “Aye so kue mbi hunda na wali so ti ke ni, alingbi lo ke ni.

¹⁴ Fade lo yeke te le ti *vinye pepe, lo yeke nyon vin wala ngangu samba pepe; akobe so ayeke *sioni, lo yeke te pepe. Alingbi lo bata atënë so mbi mu yanga na lo ti sara so.”

¹⁵ Manoa atene na ange ti KOTA GBIA: “E gbu gere ti mo, ngba na e ge kete si; e ye ti to molenge ti ngasa na mo.”

¹⁶ Ange ti KOTA GBIA akiri tënë na Manoa: “Ataa mbi ngba, mbi yeke te kobe ti mo ni pepe; me tongana mo ye ti mu *sandaga so a yeke gbi ni kue na wâ na KOTA GBIA, mo lingbi ti mu ni senge.” Manoa ahinga fade pepe atene, ange ti KOTA GBIA laa ayeke tene tënë na lo so.

¹⁷ Tongaso Manoa atene na ange ti KOTA GBIA: “Fa na e iri ti mo tongaso si e lingbi ti mu nengo na mo tongana tënë ti mo so aga ande taa-tënë.”

¹⁸ Ange ti KOTA GBIA akiri tënë na lo: “Mo ye ti hinga iri ti mbi ngbanga ti nyen? Iri ni ayeke ye ti kpene.”

¹⁹ Manoa amu mbeni molenge ti ngasa nga na sandaga ti farini, lo zia ni na ndö ti têne titene lo ya na sandaga so a yeke gbi ni kue na wâ na KOTA GBIA, na lo so lo yeke sara ye ti kpene. So Manoa na wali ti lo angba ti baa ndo,

²⁰ menga ti wâ alondo na ndö ti gbalaka so a zia sandaga ni daa so ague na nduzu. Ange ti KOTA GBIA ayeke hon na nduzu na ya ti menga ti wâ ni. So Manoa na wali ti lo abaa ye ni tongaso, ala ti akpo li ti ala na sese.

²¹ Ange ti KOTA GBIA akiri asi na Manoa na wali ti lo pepe. Tongaso, Manoa ahinga atene, so ange ti KOTA GBIA laa.

²² Manoa atene na wali ti lo: “Ti so ni, fade e yeke kui kue, ngbanga ti so e baa Nzapa awe.”

²³ Wali ti lo akiri tënë na lo: “Tongana KOTA GBIA aye fade ti fâ e fango, ka lo lingbi ti yeda pepe na sandaga ti e so a yeke gbi ni kue na wâ, ka lo lingbi ti fa na e pepe aye so kue e baa so, ka lo lingbi nga ti fa na e pepe atënë so kue e ma so.”

²⁴ Wali ti Manoa adu molenge-koli si lo di iri ti lo Samson. Molenge ni akono, KOTA GBIA asara tufa na ndö ti lo.

²⁵ Lo yeke na bâbâ ti Dan, na popo ti agbata ti Sora na ti Eshetaol. Kâ laa yingo ti KOTA GBIA aga na ndö ti lo si lo to nda ti sara aye.