Awafango-ngbanga 11 - Mbeti ti Nzapa - Tënë so amu fini

Yefte aga makonzi ti azo ti Israel

¹ Yefte, zo ti sese ti Galaad, ayeke mbeni ngangu zo ti bira. Mama ti lo ayeke mbeni wali-ndumba. Iri ti babâ ti Yefte ayeke Galaad.

² Wali ti Galaad ti da adu amolenge-koli na lo. So amolenge ni akono awe, ala tumba Yefte; ala tene na lo: “Mo yeke wara mbeni ye na peko ti kuâ ti babâ ti e pepe, ngbanga ti so mo yeke molenge ti mbeni wali nde.”

³ Tongaso Yefte akpe yongoro na tere ti a-ita ti lo, lo gue, lo sara kodro na Tob. Ambeni godobe aga na tere ti lo, ala mu maboko na lo ti sara bira.

⁴ Na pekoni, azo ti Amon ague, asara bira na azo ti Israel.

⁵ So azo ti Amon alondo na bira na tere ti azo ti Israel, *akangba so ayeke na sese ti Galaad ague ti iri Yefte na sese ti Tob.

⁶ Akangba ni atene na lo: “Ga mo duti makonzi ti aturugu ti e si e lingbi ti tiri bira na azo ti Amon.”

⁷ Yefte akiri tënë na akangba ti Galaad, atene: “Lani ala ke mbi, ala tumba mbi na da ti babâ ti mbi. Fadeso kpale ahon ndö ti ala awe si ala ga ti iri mbi ngbanga ti nyen?”

⁸ Akangba ni akiri atene na lo: “Tongana e ga na mbage ti mo fadeso, ayeke titene mo ga na tere ti e si e gue, e sara bira na azo ti Amon. Mo yeke duti ande makonzi ti e; mo yeke duti nga makonzi ti azo ti Galaad kue.”

⁹ Yefte atene na ala: “Tongana mbi na ala, e gue, e tiri bira na azo ti Amon si *KOTA GBIA asara titene mbi kinda azo ni, mbi laa mbi yeke duti ande makonzi ti ala.”

¹⁰ Akangba ti Israel atene na Yefte: “KOTA GBIA ama tënë so e tene so awe. Ayeke nzoni lo fâ ngbanga na li ti e tongana e sara ye alingbi na ni pepe.”

¹¹ Na pekoni, Yefte na akangba ni amu lege ague. Azo ti kodro amu lo si lo ga makonzi ti aturugu ti ala. Yefte atene gi atënë so kue na le ti KOTA GBIA na Mispa.

Yefte atokua azo na azo ti Amon

¹² Yefte atokua azo ti tene na gbia ti Amon, atene: “Tënë ti nyen laa ayeke na popo ti mbi na mo si mo ye ti ga ti sara bira na kodro ti mbi so?”

¹³ Gbia ti Amon akiri tënë na azo ti tokua ni, atene: “Mbi ye ti sara bira na kodro ti mo, ngbanga ti so ala azo ti Israel, ala mu kodro ti mbi na ndembe so ala londo na sese ti Ezipte ti sigigi. Ala mu kodro ni, ti londo na tere ti ngu ti Arnon ngbii asi na tere ti ngu ti Yabok nga na lando ti Jourdain. Kiri na e sese ni fadeso yeke.”

¹⁴ Yefte akiri atokua azo na gbia ti Amon

¹⁵ ti tene na lo: “Tënë so Yefte atene ayeke so: Azo ti Israel amu sese ti azo ti Moab wala ti azo ti Amon pepe.

¹⁶ Biani, na ndembe so azo ti Israel alondo na sese ti Ezipte ti sigigi, ala hon na ya ti benyama ngbii ala si na kota ngu-ingo ti Asosongo; na pekoni, ala londo na ndo so, ala si na Kades.

¹⁷ So ala si na Kades awe, ala tokua ndo na gbia ti Edom titene lo zia lege na ala ti hon na ya ti kodro ti lo. Me gbia ti Edom ayeda na ala pepe. Na pekoni, ala tokua gi oko tënë so na gbia ti Moab. Gbia ti Moab nga ake. Nilaa azo ti Israel angba na Kades.

¹⁸ Na pekoni, ala londo, ala tambula na ya ti benyama, ala ngoro sese ti Edom na ti Moab, ala si na To ti sese ti Moab. Ala sara bâbâ ti ala na mbage ti ngu ti Arnon; me ala li na sese ti Moab pepe, so ngu ti Arnon ayeke na katikati ni.

¹⁹ Azo ti Israel atokua azo na Sihon, gbia ti Amori so ale-gbia na Heshebon. Azo ti Israel atene na gbia Sihon, atene: ‘Zia e hon na ya ti kodro ti mo, e gue na ndo ti e maa!’

²⁰ Me Sihon azia be ti lo na ndö ti azo ti Israel pepe, lo ke titene ala hon na sese ti lo. Lo bongbi aturugu ti lo, ala gue, aleke bâbâ ti ala na Yahas si ala sara bira na azo ti Israel.

²¹ *KOTA GBIA, Nzapa ti Israel azia Sihon na aturugu ti lo kue na maboko ti azo ti Israel; azo ti Israel ahon ndö ti ala na bira ni. Azo ti Israel amu sese so kue azo ti Amori ayeke lango daa.

²² Ala mu sese ti azo ti Amori kue, ti londo na tere ti ngu ti Arnon ngbii asi na tere ti ngu ti Yabok; ti londo nga na benyama ngbii asi na Jourdain.

²³ KOTA GBIA, Nzapa ti Israel laa atumba azo ti mara ti Amori na dawa ti e, azo ti lo. Ti mo, mo ye ti mu sese ni na maboko ti e?

²⁴ Sese so nzapa ti mo Kemosh amu na mo so, ayeke ti mo pepe? Ti e, sese so KOTA GBIA, Nzapa ti e amu na e awe so, ayeke ti e pepe?

²⁵ Mo yeke ngangu mo hon Balak, molenge ti Sipor, gbia ti Moab? Laoko lo gi tënë na azo ti Israel, wala ti sara bira na ala?

²⁶ A sara ngu ngbangbo ota si azo ti Israel ayeke lango na Heshebon, na Aroer nga na akete kodro so ayeke na tere ni. Ala yeke lango nga na agbata so kue ayeke nduru na tere ti ngu ti Arnon. Ngbanga ti nyen laa mo mu sese ti ala na ngoi ni so pepe?

²⁷ Ti mbi, mbi sara mbeni sioni ye na mo pepe; me mo laa mo sara sioni na mbi, ngbanga ti so mo ye ti sara bira na mbi. Ayeke nzoni KOTA GBIA, lo so lo yeke fâ ngbanga ti azo kue, afâ ngbanga na popo ti azo ti Israel na azo ti Amon laso.”

²⁸ Me gbia ti Amon ama pepe atënë so Yefte atokua ti tene na lo.

Zendo so Yefte amu

²⁹ Yingo ti *KOTA GBIA aga na ndö ti Yefte. Lo hon na sese ti Galaad na ti Manase, lo gue, lo si na Mispa so ayeke na Galaad; lo londo na ndo so, lo fâ katikati ti sese ti azo ti Amon.

³⁰ Yefte amu zendo na KOTA GBIA, lo tene: “Tongana mo zia azo ti Amon na maboko ti mbi,

³¹ kozo zo so ayeke sigigi na ya ti da ti mbi ti ga ti yamba mbi, na kiringo ti mbi na peko ti kindango azo ti Amon, zo ni ayeke ga ti KOTA GBIA; mbi yeke mu lo na *sandaga so a yeke gbi ni kue na wâ na KOTA GBIA.”

³² Yefte afâ katikati ti sese ti azo ti Amon ti sara bira na ala. KOTA GBIA azia ala na maboko ti lo.

³³ Lo so benda na ndö ti ala, ti londo na Aroer ngbii asi na Minit; wungo ti agbata so kue lo mu ayeke baleuse. Lo so nga benda na ndö ti ala ngbii asi na Abel-Keramim. Tongaso laa, azo ti Amon ati biani biani na gbe ti azo ti Israel.

³⁴ Na ndembe so Yefte ayeke kiri na da ti lo so ayeke na Mispa, molenge ti lo ti wali laa asigigi ti yamba lo, lo yeke pika kete ngo si lo yeke dodo. Oko molenge ti Yefte laa; na peko ti lo, mbeni molenge ayeke daa pepe, ataa ti koli wala ti wali.

³⁵ Gi so Yefte abaa lo awe, lo suru bongo na tere ti lo si lo tene: “Ae, molenge ti mbi, mo bi mbi na ya ti mawa awe! Mo laa mo yeke zo ti bingo vundu na be ti mbi! Mbi mu zendo na KOTA GBIA awe, lege titene mbi kiri na peko ayeke daa pepe.”

³⁶ Molenge ni akiri tënë na lo, atene: “Babâ, so mo mu zendo na KOTA GBIA awe so, sara na mbi alingbi gi na tënë so mo tene, ngbanga ti so KOTA GBIA laa akiri peko ti sioni na awato ti mo, azo ti Amon.”

³⁷ Lo kiri lo tene na babâ ti lo: “Mbi hunda na mo gi ye oko: Zia na mbi nze use titene mbi na amba ti mbi, e gue, e fono na li ti ahoto. Mbi yeke gue kâ ti toto, ngbanga ti so mbi de ti hinga koli pepe si mbi yeke kui.”

³⁸ Yefte atene na lo: “Gue!” Lo mu lege na lo ti gue ndali ti nze use. Lo na amba ti lo ague na li ti ahoto ti toto, ngbanga ti so lo de ti hinga koli pepe si lo yeke kui.

³⁹ Na peko ti nze use, molenge ni akiri na tere ti babâ ti lo si babâ ni asara na lo alingbi na zendo so lo mu. Andaa molenge-wali ni ade ti hinga koli pepe. Ye ni so aga mbeni ndia na sese ti Israel.

⁴⁰ Tongaso na ya ti lango osio ti ngu oko oko, amolenge-wali so ayeke na Israel ayeke gue ti toto molenge-wali ti Yefte, zo ti Galaad.