Abia (Psaumes) 144 - Mbeti ti Nzapa - Tënë so amu fini

Sambela ti gbia

1 Bia ti David.

¹ Bia ti David. Mbi mu singila na *KOTA GBIA, Kota Têne so mbi luti na ndö ni ti bata tere ti mbi! Lo laa lo fa na mbi lege ti tiringo bira, lo leke mbi nzoni titene mbi hinga lege ti tiringo bira.

² Lo yeke *mbuki ti mbi, lo yeke tongana ngangu gbagba na tere ti mbi, lo yeke ngangu gbagba so mbi kpe daa ti honde tere ti mbi, lo yeke wasongo mbi, lo yeke *vala ti mbi; mbi honde tere ti mbi nduru na lo. Lo laa lo zia azo ti mbi na gbe ti komandema ti mbi.

³ KOTA GBIA, zo ayeke nyen si tënë ti lo agbu be ti mo tongaso? Zo ayeke nyen titene mo dabe ti mo na lo?

⁴ Zo ayeke tongana pupu senge, alango ti fini ti lo ayeke tongana gbe ti de so ayeke hon hongo.

⁵ KOTA GBIA, dingi le ti nduzu, mo zu na sese; ndu ahoto si guru asigigi daa.

⁶ Tokua wâ ti bekpa, mo kangbi ya ti ala kirikiri, bi ale ti kokora ti mo si ala kpe kirikiri.

⁷ So mo ngba na nduzu kâ, yoro maboko ti mo, mo soo mbi; zi mbi na ya ti kota ngu, zi mbi na maboko ti awande.

⁸ Atënë ti yanga ti ala gi mvene, ala yeke yoro maboko ti ala ti koli na nduzu ti deba yanga ti ala, me ala yeke sara ye alingbi na ni pepe.

⁹ Nzapa, mbi ye ti he fini bia na mo, mbi ye ti he bia ti sepela mo na kundi ti kamba baleoko.

¹⁰ Mo laa mo sara si agbia aso benda; mo laa mo zi David, zo ti kua ti mo, na yanga ti sioni yongoro zeme.

¹¹ Soo mbi, zi mbi na maboko ti awande! Atënë ti yanga ti ala gi mvene si ala yeke yoro maboko ti ala ti koli na nduzu ti deba yanga ti ala, me ala yeke sara ye alingbi na ni pepe.

¹² Ayeke nzoni amolenge ti e ti koli akono nzoni na ya ti maseka ti ala tongana akeke so akono nzoni! Amolenge ti e ti wali aga tongana angbongboro têne so a sara ni na kode si ayeke sara pendere ti ya ti yangbo ti agbia!

¹³ Ayeke nzoni ya ti agogoro ti e asi singo na anzoni ye nde nde, ataba ti e so ayeke na ya ti apere, adu saki saki, gbani gbani!

¹⁴ Ayeke nzoni abagara ti e adu gbani gbani, ala kui pepe si ala du amolenge na kuâ ni pepe! Ayeke nzoni zo akiri ama dekongo ti mbeto pepe na ndö ti abalabala ti e!

¹⁵ Ti ala nzoni, amara so ayeke na aye ni so kue! Ti ala nzoni, amara so KOTA GBIA ayeke Nzapa ti ala!