2 Mbai 35 - Mbeti ti Nzapa - Tënë so amu fini

Yosias asara matanga ti Pake

¹ Yosias asara *matanga ti Pake ndali ti *KOTA GBIA na Jérusalem. Na lango baleoko na osio ti kozo nze ni, a fâ anyama ndali ti matanga ni.

² Lo kiri lo zia awayango-sandaga na kua ti ala si lo mu wango na ala titene ala sara kua na ya ti kota da ti KOTA GBIA.

³ Na pekoni, lo tene na azo ti mara ti Lévi so a zia ala nde ndali ti KOTA GBIA si ala yeke fa ye na azo ti Israel, lo tene: “Sanduku ti *mbuki so ayeke nde si ayeke nzoni kue so, ala zia ni na ya ti kota da ti Nzapa, da so Salomon, molenge ti David, gbia ti Israel asara ando so; fade ala yeke kiri ti yo ni na ndö ti go ti ala pepe. Fadeso ala sara kua na KOTA GBIA, Nzapa ti ala, ala sara nga kua na azo ti Israel, azo ti lo.

⁴ Ala leke tere ti ala na ya ti asewa na lege ti akete mara ti ala nga na lege ti abongbi ti kua ti ala, alingbi na ndia so David, gbia ti Israel na molenge ti lo Salomon asu na mbeti.

⁵ Ayeke nzoni bongbi ti sewa oko oko ti azo ti mara ti Lévi aluti na ndo so ayeke nde si ayeke nzoni kue ti sara kua ndali ti atanga ti azo ti Israel, na lege so a kangbi ala na ya ti akete bongbi ti akete mara ti ala.

⁶ Alingbi ala fâ anyama ndali ti matanga ti Pake; nilaa alingbi ala *sukula sioni ti ala si ala leke anyama ni ndali ti a-ita ti ala, azo ti Israel; ala sara ye alingbi na tënë ti KOTA GBIA, tënë so lo tene na lege ti Moïse.”

⁷ Ndali ti azo ti Israel so ayeke kâ, Yosias azi na ndö ti anyama ti lo ataba na angasa saki baleota titene ala mu na sandaga ti Pake; lo mu nga na ala abagara saki ota.

⁸ Amakonzi ti lo, na be ti ala wani azi nga na ndö ti anyama ti ala ambeni nyama ti mu na azo ti kodro, awayango-sandaga nga na azo ti mara ti Lévi. Hilkia, Zakarii na Yehiel, amakonzi ti kota da ti Nzapa amu na awayango-sandaga ataba na angasa saki use na ngbangbo omene nga na abagara ngbangbo ota ndali ti sandaga ti Pake ni.

⁹ Amakonzi ti azo ti mara ti Lévi, Konania na a-ita ti lo Shemaya na Netaneel, Hashabia, Yeiel na Yozabad amu na azo ti mara ti Lévi ataba na angasa saki oku nga na abagara ngbangbo oku ndali ti sandaga ti Pake ni.

¹⁰ Ala leke lege ti sarango matanga ni tongaso: awayango-sandaga aluti na ndo ti kua ti ala si azo ti mara ti Lévi aluti nga na ya ti bongbi ti ala, alingbi na yanga so gbia amu.

¹¹ Azo afâ go ti anyama ni; ala mu mene ni na awayango-sandaga si awayango-sandaga afi ni na ndö ti gbalaka. Azo ti mara ti Lévi azi poro ti anyama ni.

¹² Ala zia anyama ni na mbage, so ti tene akoli-bagara ti mu na asewa ti akete mara ti azo ti Israel titene ala mu na sandaga so a yeke gbi ni kue na wâ na KOTA GBIA, alingbi na tënë so a su na ya ti mbeti ti Moïse.

¹³ Ala zö kete taba ti Pake ni zongo alingbi na tënë ti ndia si tanga ti anyama so a zia nde ndali ti Nzapa so, ala to ni na ya ti atawa, na ya ti ata ti sese nga na ya ti ambeni ta. Ala kangbi ni hio na azo ti Israel kue.

¹⁴ Na pekoni, azo ti mara ti Lévi aleke ye so ayeke ndali ti ala wani nga ndali ti awayango-sandaga, ngbanga ti so awayango-sandaga so ayeke *ahale ti Aaron angba ti mu sandaga so a yeke gbi ni kue na wâ, ala ngba nga ti zö mafuta ngbii ndo avuko. Ndani laa azo ti mara ti Lévi ato kobe ndali ti ala wani nga ndali ti awayango-sandaga so ayeke ahale ti Aaron.

¹⁵ Azo ti hengo bia so ayeke ahale ti Asaf angba na ndo ti kua ti ala, alingbi na yanga so David, Asaf, Heman na Yedutun, zo ti bango nda ti aye ti gbia amu. Azo ti batango ayanga ti gbagba angba na ndo ti kua ti ala; ala zia kua ti ala ahon pepe, ngbanga ti so a-ita ti ala, azo ti mara ti Lévi ayeke to kobe ndali ti ala.

¹⁶ Tongaso, na lango ni so, a leke ye kue ndali ti KOTA GBIA ti sara na matanga ti Pake, ti mu asandaga so a yeke gbi ni kue na wâ na ndö ti gbalaka ti KOTA GBIA, alingbi na yanga so gbia Yosias amu.

¹⁷ Na peko ti matanga ti Pake ni, azo ti Israel so ayeke kâ asara matanga ti Mapa so a sara na mama ni pepe na ya ti lango mbarambara.

¹⁸ Ti londo na ngoi ti wayanga-Nzapa Samuel, a de a sara mara ti matanga ti Pake tongaso na Israel pepe; mbeni gbia ti Israel oko asara mara ti matanga ti Pake tongaso pepe tongana ti so Yosias, awayango-sandaga, azo ti mara ti Lévi, azo ti Juda kue nga na azo ti Israel so ayeke kâ, ala na azo ti Jérusalem asara.

¹⁹ A sara mara ti matanga ti Pake tongaso na ngu baleoko na miombe ni so Yosias ale-gbia.

Lengo-gbia ti Yosias asi na ndani

²⁰ Na peko ti ye so kue, tongana Yosias aleke kota da ti Nzapa awe, Neko, gbia ti Ezipte ague ti tiri bira na gbata ti Karkemish na tere ti *bale ti Efrate. Yosias ague ti tiri bira na lo.

²¹ Neko atokua azo ti tene na Yosias, atene: “Gbia ti Juda, tënë ti nyen laa ayeke na popo ti mbi na mo, nyen? Mbi ga ti tiri bira na mo pepe, me mbi ga ti tiri bira na mbeni wato ti mbi nde. Nzapa atene na mbi ti gue hio. Nzapa so ayeke na mbi so, mo tiri na lo pepe, tongaso pepe lo yeke fâ mo.”

²² Me Yosias aye gi ti tiri bira na Neko. Tënë so Nzapa azia na yanga ti Neko si lo tene so, Yosias ama ni pepe. Tongaso, lo zi bongo ti lo si lo yu mbeni nde titene azo ahinga lo pepe si lo gue ti tiri bira na popo-hoto ti Megido.

²³ Azo ti pikango kokora atokua le ti kokora na tere ti gbia Yosias si Yosias atene na azo ti lo: “Mbi wara kota ka awe, ala hon na mbi.”

²⁴ Azo ti kua ti lo azi lo na ya ti pusu ti mbarata ti lo ti bira, ala zia lo na ya ti use pusu ti mbarata ti lo si ala gue na lo na Jérusalem. Yosias akui kâ si ala lu lo na ya ti sende ti kuâ ti akotara ti lo. Azo ti Juda kue na azo ti Jérusalem asara mua ti lo.

²⁵ Wayanga-Nzapa Jérémie aleke mbeni bia ti totongo na kuâ ti Yosias. Ti londo na ngoi so ngbii asi laso, azo ti hengo bia, akoli kue na awali kue atene tënë ti Yosias na ya ti abia ti ala. Sarango ye tongaso aga mbeni ndia na sese ti Israel. A su abia so na Mbeti ti abia ti totongo kuâ.

²⁶ Tanga ti atënë na ndö ti Yosias, aye so lo sara alingbi na tënë ti ndia ti KOTA GBIA,

²⁷ aye so lo sara, na tongo ndani ngbii asi na ndani, a su tënë ni na ya ti mbeti ti agbia ti Israel na ti Juda.