2 Mbai 27 - Mbeti ti Nzapa - Tënë so amu finiLengo-gbia ti Yotam ( 2 Agbia 15.32-38 ) 1 Yotam ayeke na ngu baleuse na oku si lo ga gbia; lo le-gbia ngu baleoko na omene na Jérusalem. Iri ti mama ti lo ayeke Yerusha, molenge ti Sadok. 2 Yotam asara ye so ayeke mbirimbiri na le ti *KOTA GBIA gi tongana ti so babâ ti lo Ozias asara. Ti lo, lo li na ya ti kota da ti KOTA GBIA pepe. Me azo ti kodro ni angba lakue ti sara sioni. 3 Yotam laa asara yanga ti gbagba ti kota da ti KOTA GBIA, yanga ni ti mbage ti nduzu. Lo sara akua mingi ti kpengba ngangu gbagba ti vaka ti Ofel. 4 Lo sara agbata na sese ti Juda so ahoto ayeke daa; lo sara agbagba ti bira nga na ada so ayo na nduzu na ya ti gbako. 5 Lo laa lo tiri bira na gbia ti azo ti mara ti Amon si lo so benda na ndö ti ala. Na ngu ni so, azo ti Amon afuta na Yotam kilo saki ota ti wen ti nginza, kilo kutu ota ti *ble na kilo kutu ota ti *orze. Azo ti Amon afuta na lo gi oko aye ni na use ngu ni nga na ota ngu ni. 6 Yotam awara ngangu mingi, ngbanga ti so lo tambula mbirimbiri na le ti KOTA GBIA, Nzapa ti lo. 7 Tanga ti atënë na ndö ti Yotam, aye so kue lo sara, abira so kue lo tiri, a su tënë ni na ya ti “Mbeti ti agbia ti Israel na ti Juda”. 8 Lo yeke na ngu baleuse na oku si lo ga gbia; lo le-gbia ngu baleoko na omene na Jérusalem. 9 Yotam akui, lo hon na peko ti ababâ ti lo, a lu lo na Gbata ti David. Molenge ti lo Ahaz laa aga gbia na peko ti lo. |
© La Société Biblique de Centrafrique 2010
Bible Society in the Central African Republic