2 Mbai 25 - Mbeti ti Nzapa - Tënë so amu fini

Lengo-gbia ti Amasia

¹ Amasia ayeke na ngu baleuse na oku si lo ga gbia; lo le-gbia ngu baleuse na gumbaya na Jérusalem. Iri ti mama ti lo ayeke Yoadan, zo ti Jérusalem.

² Amasia asara ye so ayeke mbirimbiri na le ti *KOTA GBIA, me na be ti lo kue pepe.

³ So Amasia asara si lengo-gbia ti lo akpengba awe, lo fâ amakonzi ti aturugu so lani afâ babâ ti lo, gbia Yoas so.

⁴ Me lo fâ amolenge ti ala pepe, alingbi na tënë so a su na ya ti mbeti ti *Ndia, so ti tene mbeti ti Moïse. Na ya ti mbeti ni, KOTA GBIA amu yanga, atene: “Alingbi ti fâ ababâ na amama pepe ndali ti siokpari ti amolenge ti ala; alingbi nga ti fâ amolenge pepe ndali ti siokpari ti ababâ na amama ti ala; zo oko oko ayeke kui ndali ti siokpari ti lo wani.”

⁵ Amasia abongbi azo ti Juda na ala ti Benjamin; lo kangbi ala na lege ti asewa ti ala. Lo zia amakonzi na li ti aturugu saki oko, amakonzi na li ti aturugu ngbangbo oko. A diko wungo ti aturugu so ngu ti ala alingbi ngu baleuse na ala so ngu ti ala ahon baleuse; a wara azo 300 000 so ahinga ti tiri bira nzoni, ala lingbi ti bi likongo, ti gbu *vala nzoni.

⁶ Na pekoni, Amasia afuta kilo ti wen ti nginza saki ota si lo mu angangu turugu ti Israel 100 000 na kua.

⁷ Me mbeni zo ti Nzapa aga atene na lo: “Gbia, alingbi mo na aturugu ti Israel ague na bira pepe, ngbanga ti so KOTA GBIA ayeke na azo ni pepe, azo ti Efraim so kue!

⁸ Tongana mo na ala ague, ataa mo tiri bira ni na ngangu ti mo kue, fade Nzapa ayeke sara titene mo ti na gbe ti awato ti mo, ngbanga ti so gi Nzapa oko laa ayeke na ngangu ti mu maboko na zo, wala ti sara si zo ati.”

⁹ Amasia atene na zo ti Nzapa ni: “Ka gba ti nginza so mbi mu na aturugu so, fade a sara na ni nyen?” – Zo ti Nzapa ni akiri tënë, atene: “KOTA GBIA alingbi ti mu na mo ye mingi ahon so!”

¹⁰ Amasia atumba aturugu so alondo na Efraim si aga so titene ala kiri na ndo ti ala. Me ala sara ngonzo mingi na tere ti azo ti Juda si ala kiri na kodro na ngonzo ti wâ na be ti ala.

¹¹ Amasia awara ngangu; lo na aturugu ti lo ague na popo-hoto ti Ingo si lo fâ azo ti Edom saki baleoko.

¹² Aturugu ti Juda agbu aturugu ti Edom saki baleoko. Ala gue na aturugu ni na li ti mbeni kota têne, ala pusu ala kâ ti ti na gbeni; ala kue, ya ti ala asungba.

¹³ Aturugu so lani Amasia atumba ala titene ala na lo ague na bira pepe so, ala mu ya ti agbata ti Juda kue, alondo na Samarii ngbii asi na gbata ti Bet-Horon; ala fâ azo saki ota si ala gbu ye mingi ti azo.

Yoas, gbia ti Israel, akinda Amasia

¹⁴ So Amasia akiri na kodro na peko ti so lo kinda azo ti Edom awe, lo mu ayanda ti azo ti Edom ni, lo ga na ala. Lo baa ayanda ni tongana anzapa ti lo, lo yeke voro ala si lo yeke zö dukani ndali ti ala.

¹⁵ Tongaso, ngonzo ti *KOTA GBIA alondo na tere ti Amasia tongana wâ si lo tokua mbeni wayanga-Nzapa na Amasia ti tene na lo: “Anzapa so alingbi ti zi azo ti ala na maboko ti mo pepe so, ngbanga ti nyen si mo gue na peko ti ala?”

¹⁶ So wayanga-Nzapa ni angba ti tene tënë, Amasia afâ tënë na yanga ti lo si lo tene: “Zo wa laa azia mo wamungo-wango na gbia, zo wa? Kai tënë so! Mo ye pika?” Wayanga-Nzapa ni akai, me lo tene: “Fadeso mbi hinga, mbi tene, Nzapa aleke na be ti lo titene mo kui, ngbanga ti so mo sara ye so si mo ke ti ma wango ti mbi.”

¹⁷ Amasia, gbia ti Juda ahunda wango na ambeni zo si lo tokua azo ti tene na Yoas, molenge ti Yoakaz, molenge ti Yehu, gbia ti Israel, atene: “Ga, mbi na mo, e tengbi tere, e baa!”

¹⁸ Yoas, gbia ti Israel akiri tënë na Amasia, gbia ti Juda, atene: “Mbeni lâ, kete keke ti ki ti hoto ti Liban atokua na keke ti sedre ti Liban atene: Mu molenge ti mo titene lo ga wali ti molenge ti mbi ti koli. Me mbeni nyama ti hoto ti Liban ahon na ndö ti kete keke ti ki ni si lo nika ni.”

¹⁹ Yoas akiri atene: “Taa-tënë, mo fâ azo ti Edom awe; mo yeke pika kate ti mo si mo yeke gonda tere ti mo. Me ayeke nzoni titene mo ngba na ndo ti mo fadeso! Ngbanga ti nyen si mo ye ti to nda ti bira so ayeke ga ande kpale na ndö ti mo, titene a fâ mo si a fâ nga aturugu ti Juda so?”

²⁰ Me Amasia ama tënë ti lo so pepe. Biani, Nzapa ayeda tongaso ti zia Amasia na aturugu ti lo na maboko ti awato ti ala, ngbanga ti so ala mu peko ti anzapa ti Edom.

²¹ Tongaso Yoas, gbia ti Israel ague si lo na Amasia, gbia ti Juda atiri bira na Bet-Shemesh, mbeni gbata ti Juda.

²² Aturugu ti Israel akinda aturugu ti Juda si turugu oko oko ti Juda akpe ague na da ti lo.

²³ Na Bet-Shemesh, Yoas, gbia ti Israel agbu Amasia, gbia ti Juda, molenge ti Yoas, molenge ti Ahazia. Yoas ague na Amasia na Jérusalem. Yoas akungbi mbage ti gbagba ti Jérusalem nduru na metere ngbangbo use, alondo na yanga ti gbagba so iri ni Ti-Efraim ngbii asi na mbeni yanga ni so iri ni Ti-Ndangoro.

²⁴ Yoas amu lôro kue, wen ti nginza na aye so kue ayeke na ya ti kota da ti Nzapa si Obed-Edom ayeke bata ni so; lo mu nga aye so ayeke na ya ti kubu so a yeke bata amosoro ti yangbo ti gbia daa. Lo gbu nga ambeni zo, lo bata ala ti ku titene a futa mbeni ye na lo si; na pekoni lo kiri na Samarii.

Lengo-gbia ti Amasia asi na ndani

²⁵ Amasia, molenge ti Yoas, gbia ti Juda angba na fini ngu baleoko na oku na peko ti kuâ ti Yoas, molenge ti Yoakaz, gbia ti Israel.

²⁶ Tanga ti atënë na ndö ti Amasia, na tongo nda ni ngbii asi na ndani, a su tënë ni na ya ti “Mbeti ti agbia ti Juda na ti Israel”.

²⁷ Ti londo na ndembe so Amasia azia peko ti lo na *KOTA GBIA, ambeni zo ato nda ti leke tënë na hondengo ni na tere ti lo na Jérusalem. Lo kpe, lo gue na Lakish; me azo atumba peko ti lo na Lakish si ala fâ lo kâ.

²⁸ Na pekoni, a zia kuâ ti lo na ndö ti pusu ti ambarata, a ga na ni si a lu ni na tere ti ababâ ti lo na gbata ti Juda.