2 Agbia 7 - Mbeti ti Nzapa - Tënë so amu fini

¹ Élisée akiri tënë: “Ala ma tënë ti *KOTA GBIA si! Tënë so KOTA GBIA atene ayeke so: ‘Kekereke, gi na oko ngbonga so, na yanga ti gbata ti Samarii, fade azo ayeke vo kilo baleoko na use ti farini na le ti nginza oko; ala yeke vo kilo baleuse na osio ti *orze na le ti nginza oko.’ ”

² Mbeni turugu ti kota kamba ti gbia ti Israel, lo so lo yeke lakue nduru na tere ti gbia akiri tënë na Élisée, atene: “Ataa KOTA GBIA azi fenetere ti yayu, atënë so mo tene so, fade ayeke ga taa-tënë?” Élisée akiri tënë: “Fade mo yeke baa ye ni na le ti mo, me mo yeke te ande kobe ni pepe.”

Azo ti Sirii azia bâbâ ti ala ahon

³ Ambeni zo ti buruma osio ayeke na yanga ti gbata ni. Ala tene na popo ti ala, atene: “E ngba na ndo so titene e kui ngbanga ti nyen?

⁴ Tongana e tene: ‘E li na ya ti gbata ni’, fade e yeke kui kâ, ngbanga ti so kota nzara ati na ya ti gbata ni. Tongana e ngba na ndo so, fade e yeke kui nga kuingo. Tongaso, ayeke nzoni e londo, e gue na ya ti bâbâ ti azo ti Sirii. Tongana ala ye ti fâ e, ala fâ e! Tongana ala ye titene e ngba na fini, fade e ngba na fini!”

⁵ Na lakui, so ndo ato nda ti vuko, ala londo ti gue na ya ti bâbâ ti azo ti Sirii. Tongana ala si na yanga ti bâbâ ni, ala baa zo oko pepe.

⁶ Biani, Kota Gbia asara si azo ti Sirii ama na ya ti bâbâ ti ala kâ toto ti ambarata, ti apusu ti mbarata nga na toto ti gba ti aturugu. Tongaso azo ti Sirii atene na popo ti ala, atene: “Gbia ti Israel afuta agbia ti mara ti Het na agbia ti Ezipte titene ala tokua aturugu ti ala ti tiri bira na e!”

⁷ Na lakui, so ndo ato nda ti vuko, azo ti Sirii alondo, ala kpe titene ala soo fini ti ala. Ala do bâbâ ti ala azia ni gi tongaso: ala zia ada ti ala ti bongo, ambarata ti ala nga na alele ti ala.

⁸ Azo ti buruma ni ahon na ya ti bâbâ ni kue, ala li na ya ti mbeni da ti bongo. Kâ, ala te, ala nyon. Na pekoni, ala mu nginza, lôro na abongo, ala gue, ahonde ni. Ala kiri ali na ya ti mbeni da ti bongo nde. Aye so ayeke na ya ti da ni, ala mu, ague, ahonde ni.

Kota nzara ni ahunzi awe

⁹ Azo ti buruma ni atene na popo ti ala: “Ye so e sara so ayeke nzoni pepe! Laso ayeke lango ti nzoni sango. Tongana e kanga yanga ti e ti ku titene ndo ahan si e tene tënë ni na azo, gbaa fade a yeke fâ ngbanga na li ti e. Ayeke nzoni e li na ya ti gbata ni, e tene tënë ni na azo ti yangbo ti gbia.”

¹⁰ Ala kiri na ya ti gbata ni, ala iri asanziri ti yanga ti gbagba ni si ala tene na ala: “E gue, e li na ya ti bâbâ ti azo ti Sirii, me e baa zo oko pepe, e ma nga go ti zo oko pepe. Ye so e baa kâ ayeke gi ambarata na alele so a kanga ala kangango; azo ni ado ada ti bongo azia ahon.”

¹¹ Asanziri ni airi mbeni zo na ya ti gbagba ni kâ titene lo gue, lo tene tënë ni na azo ti yangbo ti gbia.

¹² Gbia alondo na bi ni; lo tene na azo ti kua ti lo: “Mbi ye ti fa na ala nda ti ye so azo ti Sirii ayeke leke ti sara na e. Ala hinga atene, nzara ahon ndö ti e. Ndani laa ala zia bâbâ ti ala, ala sigigi ti honde tere ti ala na ya ti ngonda. Ala tene: ‘Tongana azo ti Israel alondo na ya ti gbata ni ti sigigi, fade e yeke gbu ala na fini le ti ala si na pekoni, e yeke li na ya ti gbata ti ala.’ ”

¹³ Mbeni zo ti kua ti gbia oko amu tënë si atene: “Ayeke nzoni e mu ambarata oku na popo ti ala so angba na fini. Ti ala ni, ala yeke tongana gba ti azo ti Israel so kue angba na ya ti gbata ni, ala yeke tongana gba ti azo ti Israel so ayeke gue ti kui kuingo. E tokua ala si e baa ye so ayeke si na peko ni!”

¹⁴ Tongaso gbia amu apusu use na ambarata ni si lo tokua azo na peko ti aturugu ti Sirii, lo tene: “Ala gue, abaa ye ni si!”

¹⁵ Azo ni atumba peko ti aturugu ti Sirii ngbii asi na ngu ti Jourdain. Na tumbango peko ti azo ni, ala baa abongo na akungba so asi singo na ndö ti lege. Azo ti Sirii atuku akungba ni na sese na ndembe so ala yeke kpe ti hon. Awatokua ni akiri si ala tene tënë ni na gbia.

¹⁶ Gi hio tongaso, azo ti gbata ti Samarii ague si ala nzi aye so ayeke na ya ti bâbâ ti azo ti Sirii. Azo avo kilo baleoko na use ti farini na le ti nginza oko wala kilo baleuse na osio ti *orze na le ti nginza oko alingbi na tënë ti *KOTA GBIA.

¹⁷ Turugu ti kota kamba so ayeke lakue nduru na tere ti gbia, gbia amu yanga na lo titene lo gue, lo baa ye so asi na yanga ti gbagba ti gbata ni. Me azo apete lo ngangu na tere ti yanga ti gbagba ni si lo kui alingbi na tënë so lani Élisée atene na ndembe so gbia aga ti baa lo.

¹⁸ Biani, Élisée atene lani na gbia, atene: “Kekereke, gi na oko ngbonga so, fade azo ayeke vo kilo baleoko na use ti farini na le ti nginza oko, ala yeke vo kilo baleuse na osio ti orze na le ti nginza oko na gara ti Samarii.”

¹⁹ Turugu ti kota kamba ti gbia atene lani na Élisée: “Ataa KOTA GBIA azi fenetere na yayu, atënë so mo tene so, fade ayeke ga taa-tënë?” Élisée akiri tënë, atene: “Fade mo yeke baa ye ni na le ti mo, me mo yeke te kobe ni pepe.”

²⁰ Ye so laa asi na lo: azo ti kodro apete turugu ti kota kamba ni na tere ti yanga ti gbagba si lo kui.