2 Agbia 1 - Mbeti ti Nzapa - Tënë so amu fini

Nzapa afâ ngbanga na ndö ti sarango ye ti Ahazia

¹ Na peko ti kuâ ti gbia Akab, azo ti Moab atomboka na tere ti azo ti Israel.

² Mbeni lâ, gbia Ahazia aduti na ya ti mbeni kubu ti nduzu ti yangbo ti lo so ayeke na gbata ti Samarii. Lo londo kâ, lo ti na sese na le ti fenetere si lo wara kota ka. Tongaso lo tokua azo, lo tene na ala: “Ala gue, ahunda Baal-Zebub, nzapa ti gbata ti Ekron ti hinga wala fade ka ti mbi ni ayeke mu?”

³ Me *ange ti *KOTA GBIA aga atene na Élie, zo ti gbata ti Tishebe, atene: “Londo, mo gue, mo wara azo so gbia ti Samarii atokua ala so; mo tene na ala, mo tene: ‘Nzapa ayeke na Israel pepe? Ala gue ti hunda Baal-Zebub, nzapa ti gbata ti Ekron ngbanga ti nyen?’

⁴ Ndani laa, tënë so KOTA GBIA atene ayeke so: ‘Gbogbo so mo lango daa so, fade mo yeke londo na ndö ni pepe; mo yeke kui biani!’ ” Na pekoni, Élie ague ti lo.

⁵ Awatokua ni akiri na tere ti gbia Ahazia si lo hunda ala, lo tene: “Ala kiri ngbanga ti nyen?” Ala kiri tënë na lo:

⁶ “Mbeni koli aga awara e na lege si lo tene na e: ‘Ala kiri na mbage ti gbia so atokua ala si ala tene na lo: Tënë so KOTA GBIA atene ayeke so: Nzapa ayeke na Israel pepe? Ala gue ti hunda Baal-Zebub, nzapa ti gbata ti Ekron ngbanga ti nyen? Ndani laa gbogbo so mo lango daa so, fade mo yeke londo na ndö ni pepe. Fade mo yeke kui biani!’ ”

⁷ Gbia ahunda ala, atene: “Koli so awara ala na lege si atene tënë ni na ala so, lo yeke tongana nyen?”

⁸ Ala kiri tënë na lo: “Koli ni ayu mbeni bongo so a sara na kua ti tere ti nyama, lo kanga kamba ti poro ti nyama na ngbonda ti lo.” Tongaso Ahazia atene: “Élie, zo ti gbata ti Tishebe laa!”

Ahazia aye titene azo agbu Élie

⁹ Gbia atokua mbeni makonzi ti aturugu so lo yeke na li ti aturugu baleoku na aturugu ti lo baleoku ti gbu Élie. Ala gue na li ti hoto si ala wara Élie so ayeke duti kâ. Makonzi ti aturugu ni atene na lo: “Zo ti Nzapa, gbia amu yanga, atene: Mo zu!”

¹⁰ Élie akiri tënë na makonzi ti aturugu ni, atene: “Tongana mbi yeke zo ti Nzapa, ayeke nzoni wâ alondo na yayu aga agbi mo na aturugu ti mo baleoku so kue!” Tongaso wâ alondo na yayu aga agbi lo na aturugu ti lo baleoku so kue.

¹¹ Gbia akiri atokua mbeni makonzi ti aturugu so lo yeke na li ti aturugu baleoku na aturugu ti lo baleoku ti gbu Élie. Makonzi ti aturugu ni atene na Élie: “Zo ti Nzapa, tënë so gbia atene ayeke so: Mo zu hio!”

¹² Élie akiri tënë: “Tongana mbi yeke zo ti Nzapa, ayeke nzoni wâ alondo na yayu aga agbi mo na aturugu ti mo baleoku so kue!” Tongaso wâ ti Nzapa alondo na yayu aga agbi lo na aturugu ti lo baleoku so kue.

¹³ Ti fani ota ni, Ahazia akiri atokua mbeni makonzi so ayeke na li ti aturugu baleoku na aturugu ti lo baleoku ti gbu Élie. Makonzi ni na aturugu ti lo ague na li ti hoto ni. So lo si na tere ti Élie, lo kuku na sese na gbe ti Élie, lo voro lo, lo tene: “Zo ti Nzapa, mbi gbu gere ti mo, bata fini ti mbi na ti aturugu baleoku so ayeke azo ti kua ti mo!

¹⁴ Baa, wâ alondo na yayu aga agbi akozo makonzi use so ayeke na li ti aturugu baleoku so kue awe. Wâ ni agbi ala na aturugu ti ala kue. Me ti fadeso, mbi gbu gere ti mo, bata fini ti mbi!”

¹⁵ *Ange ti *KOTA GBIA atene na Élie: “Mo na lo azu; mbeto ti lo asara mo pepe!” Élie alondo si lo na makonzi ti aturugu ni azu ti gue na mbage ti gbia.

¹⁶ Élie atene na gbia: “Tënë so KOTA GBIA atene ayeke so: ‘So mo tokua azo ti hunda Baal-Zebub, nzapa ti gbata ti Ekron so, ti mo, mo baa mo tene, Nzapa ayeke na Israel pepe titene azo ahunda lo? Ndali ti ye so mo sara so, gbogbo so mo lango daa so, fade mo yeke londo na ndö ni pepe. Mo yeke kui biani!’ ”

¹⁷ Ahazia akui alingbi na tënë ti KOTA GBIA so Élie atene. Ndali ti so Ahazia ayeke na molenge pepe, ita ti lo Yoram aga gbia na peko ti lo na use ngu ni so Yoram, molenge ti Yosafat ayeke gbia ti Juda.

¹⁸ Tanga ti atënë na ndö ti Ahazia na aye so lo sara, a su tënë ni na ya ti “Mbeti ti aye so agbia ti Israel asara”.