1 Samuel 31 - Mbeti ti Nzapa - Tënë so amu fini

Saul akui

¹ Azo ti Filistii ayeke tiri bira na azo ti Israel. Azo ti Israel akpe na dawa ti azo ti Filistii si a fâ ala mingi na hoto ti Gilboa.

² Azo ti Filistii aga nduru nduru na Saul nga na amolenge ti lo. Ala fâ Jonatan, Abinadab nga na Malkishua, amolenge ti Saul.

³ Bira ni ane na ndö ti Saul. Azo ti pikango kokora abaa lo si kota mbeto agbu lo.

⁴ Saul atene na zo so ayo aye ti bira ti lo, atene: “Gboto yongoro zeme ti mo, mo koro ya ti mbi, ngbanga ti so mbi ye pepe titene azo so ahinga Nzapa pepe so aga akoro ya ti mbi si ala he mbi.” Me zo so ayo aye ti bira ni ake, ngbanga ti so mbeto asara lo mingi. Nilaa Saul amu yongoro zeme ti lo azia si lo ti na yanga ni.

⁵ So zo so ayo aye ti bira ti lo abaa so Saul akui awe, lo nga lo ti na yanga ti yongoro zeme ti lo si lo kui legeoko na lo.

⁶ Tongaso, Saul na amolenge ti lo ota, na zo ti yongo aye ti bira ti lo nga na azo ti lo kue, ala kui legeoko gi na lango ni so.

⁷ So azo ti Israel so ayeke lango na mbage ti popo-hoto na ala so ayeke lango na mbage ti ngu ti Jourdain abaa so, azo ti Israel ayeke kpe si Saul na amolenge ti lo akui awe, ala do agbata ti ala azia si ala kpe. Azo ti Filistii aga si ala duti daa.

⁸ Na ndade ni, azo ti Filistii aga ti nzi aye ti azo so akui so. Ala wara kuâ ti Saul na ti amolenge ti lo ota so ayeke lango na sese, na hoto ti Gilboa.

⁹ Ala fâ li ti Saul, ala zi aye ti bira ti lo na tere ti lo. Na pekoni, ala tokua azo ti vunga sango ni na ya ti kodro ti azo ti Filistii kue, na ya ti ada ti ayanda ti ala nga na azo ti ala.

¹⁰ Ala zia aye ti bira ti Saul na ya ti da ti nzapa *Astarte si ala pika kuâ ti Saul na pondi na tere ti gbagba ti Bet-Shean.

¹¹ Azo ti Yabesh, na sese ti Galaad ama tënë ti ye so azo ti Filistii asara na Saul.

¹² Akpengba turugu atambula bi bi bi, ala gue, azi kuâ ti Saul na ti amolenge ti lo na tere ti gbagba ti Bet-Shean, ala kiri na Yabesh si ala gbi ni.

¹³ Ala mu abio ti akuâ ti ala si ala lu ni na gbe ti keke ti tamaris na Yabesh; ala ke kobe na ya ti lango mbarambara.