1 Mbai 26 - Mbeti ti Nzapa - Tënë so amu fini

Abongbi ti azo ti batango ayanga ti gbagba

¹ A kangbi nga azo ti batango ayanga ti gbagba na ya ti abongbi nde nde. Ti azo ti kete mara ti Kore: Meshelemia, molenge ti Kore; Kore ayeke molenge ti Asaf.

² Meshelemia adu amolenge mbarambara: kozo molenge ni ayeke Zakarii, use ni ayeke Yediael, ota ni ayeke Zebadia, osio ni ayeke Yatniel,

³ oku ni ayeke Elam, omene ni ayeke Yohanan, mbarambara ni ayeke Eliohenai.

⁴ Obed-Edom adu amolenge miombe: kozo molenge ni ayeke Shemaya, use ni ayeke Yozabad, ota ni ayeke Yoa, osio ni ayeke Sakar, oku ni ayeke Netaneel,

⁵ omene ni ayeke Amiel, mbarambara ni ayeke Isakar, miombe ni ayeke Peultai. Biani, Nzapa asara tufa na ndö ti Obed-Edom.

⁶ Kozo molenge ti Obed-Edom, Shemaya, adu amolenge-koli so ayeke na komandema na ya ti sewa ti ala, ngbanga ti so ala yeke akpengba turugu.

⁷ Amolenge ti Shemaya ayeke Otni, Refael, Obed na Elzabad, ala na a-ita ti ala Elihu na Semakia so ala yeke angangu koli.

⁸ Ala so kue ayeke *ahale ti Obed-Edom, ala na amolenge ti ala na a-ita ti ala; ala kue ayeke angangu koli si ala yeke sara kua ti ala ngangu. Wungo ti ala kue ayeke baleomene na use.

⁹ Azo so ayeke na ya ti bongbi ti Meshelemia ayeke amolenge ti lo na a-ita ti lo; ala yeke angangu koli. Wungo ti ala kue ayeke baleoko na miombe.

¹⁰ Hosa, zo ti kete mara ti Merari, adu amolenge osio: Shimri, kota zo ni; lo laa lo yeke yaya ni pepe, me babâ ti lo azia lo kota zo na ndö ti sewa ni;

¹¹ Hilkia, use molenge ni; Tebalia, ota ni; Zakarii, osio ni. Azo so ayeke na ya ti bongbi ti Hosa ayeke amolenge ti lo na a-ita ti lo. Wungo ti ala kue ayeke baleoko na ota.

¹² Azo ti batango ayanga ti gbagba so, amakonzi ni na azo ti ya ti abongbi nde nde ayeke sara kua ti ala legeoko na ya ti kota da ti *KOTA GBIA.

¹³ A bi mbeni ye si a kangbi kua ti batango ayanga ti gbagba oko oko na popo ti azo ni, na lege ti asewa ti ala oko oko; a kangbi akua ni alingbi tere, ataa na akota zo, wala na akete zo.

¹⁴ A bi ye ni si afa titene a zia Shelemia na yanga ti gbagba ti mbage ti To. Ti molenge ti lo Zakarii so ayeke wamungo-wango so le ti lo azi, a bi ye ni si afa titene a zia lo na yanga ti gbagba ti mbage ti Banga.

¹⁵ Ti Obed-Edom, a zia lo na yanga ti gbagba ti mbage ti Mbongo; ti amolenge ti lo, a zia ala ti bata da so a yeke bata akungba daa.

¹⁶ Ti Shupim na Hosa, a zia ala na yanga ti gbagba ti mbage ti Do nga na yanga ti gbagba ti Shaleket, na lege so ague na mbage ti nduzu. A kangbi abongbi oko oko ti batango ayanga ti gbagba ni tongaso:

¹⁷ na mbage ti To, a mu azo ti mara ti Lévi omene na ya ti lango oko; na mbage ti Banga, a mu ala osio na ya ti lango oko, na mbage ti Mbongo, a mu ala osio na ya ti lango oko; ti da so a yeke bata akungba daa, a mu ala osio si a zia ala use use na ando use;

¹⁸ ti da so agbu tere na kota da ti Nzapa si ayeke na mbage ti Do, a zia azo osio na tere ti lege si azo use na ya ti da ni.

¹⁹ So ayeke abongbi ti azo ti batango ayanga ti gbagba so a soro ala na ya ti kete mara ti Kore nga na ti Merari laa.

Ambeni kua nde so a mu na ambeni zo ti mara ti Lévi

²⁰ Mbeni zo ti mara ti Lévi, Ahia, kua ti lo ayeke ti baa ndo na ndö ti kubu so a bata amosoro ti kota da ti Nzapa daa nga na aye so a zia nde ndali ti Nzapa.

²¹ Ladan ayeke zo ti kete mara ti Gershon. *Ahale ti lo ayeke amakonzi ti asewa ti ala. Na popo ti ahale ti Ladan ni, azo ti kete mara ti Yehieli ayeke daa.

²² Amolenge ti Yehieli ayeke Zetam na ita ti lo Joël; ala yeke baa ndo na ndö ti kubu so a bata amosoro ti kota da ti *KOTA GBIA daa.

²³ Ti akete mara ti Amram, ti Isar, ti Hebron na ti Uziel,

²⁴ Shebuel ayeke daa; Shebuel ayeke mbeni hale ti Gershom, molenge ti Moïse. Shebuel laa ayeke kota zo so ayeke baa ndo na ndö ti kubu so a bata amosoro kue daa.

²⁵ Ambeni ita ti Shebuel ayeke ahale ti Eliezer, ita ti Gershom. Molenge ti Eliezer ayeke Rehabia; molenge ti Rehabia ayeke Yeshaya; molenge ti Yeshaya ayeke Yoram; molenge ti Yoram ayeke Zikri; molenge ti Zikri ayeke Shelomit.

²⁶ Shelomit, lo na a-ita ti lo ayeke baa ndo na ndö ti aye so kue gbia David, na amakonzi ti asewa, na amakonzi ti aturugu 1 000 na ti aturugu 100 nga na amakonzi nde nde ti aturugu azia ni nde ndali ti Nzapa.

²⁷ Mbage ti aye so azo ni so agbu na peko ti bira, ala zia ni nde ndali ti lekengo na kota da ti KOTA GBIA.

²⁸ Aye so kue wayanga-Nzapa Samuel, Saul, molenge ti Kish, Abner, molenge ti Ner, Yoab, so iri ti mama ti lo ayeke Seruya, azia nde ndali ti Nzapa; Shelomit na a-ita ti lo laa ayeke baa ndo na ndö ni.

²⁹ Kenania na amolenge ti lo ayeke azo ti kete mara ti Isar; ala yeke baa lege ti atënë nde nde na popo ti azo ti Israel, ala yeke awakuasu nga na awafango-ngbanga.

³⁰ Na popo ti azo ti kete mara ti Hebron, Hashabia na a-ita ti lo ayeke daa; ala yeke angangu koli, wungo ti ala kue ayeke 1 700; ala yeke baa ndo na ndö ti sese ti Israel so ayeke na mbage ti ngu ti Jourdain. Ala yeke baa lege ti atënë nde nde so ayeke na popo ti azo ti Israel, ataa atënë ti kua ti KOTA GBIA na atënë ti kua ti gbia.

³¹ Yeria ayeke nga daa; lo yeke makonzi ti azo ti kete mara ti Hebron. Na ngu baleosio ni so David ayeke gbia, a gi ti hinga molongo ti dungo ti azo ti kete mara ni so; nilaa na kodro ti Yazer, na sese ti Galaad, a wara akpengba turugu na popo ti ala.

³² Yeria na a-ita ti lo ayeke angangu koli, wungo ti ala ayeke 2 700; ala yeke amakonzi ti sewa ti ala. Gbia David azia ala ti baa lege ti akua kue ti KOTA GBIA na kua ti gbia, na sese ti azo ti mara ti Ruben, ti Gad na ti ndambo ti mara ti Manase.