1 Mbai 25 - Mbeti ti Nzapa - Tënë so amu fini

Abongbi ti azo ti hengo bia

¹ David na amakonzi ti abongbi azia ambeni *hale ti Asaf, ti Heman na ti Yedutun nde ti sara kua ti Nzapa. Ala yeke he bia ti tene atënë so alondo na Nzapa si ala yeke pika na gbe ni akundi, akete kundi nga na awen so ayeke toto. Iri ti azo so a mu ala ndali ti kua ni ayeke so:

² Amolenge ti Asaf: Zakur, Joseph, Netania na Asarela. Ala yeke sara kua na gbe ti babâ ti ala so ayeke he bia ti tene tënë so alondo na Nzapa alingbi na yanga so gbia amu.

³ Amolenge ti Yedutun: Gedalia, Seri, Yeshaya, Shimei, Hashabia na Matitia. Amolenge ni omene kue ayeke sara kua na gbe ti babâ ti ala so ayeke he bia ti tene tënë so alondo na Nzapa si ala yeke pika kundi na gbe ti bia ni ti sepela na ti gonda *KOTA GBIA.

⁴ Amolenge ti Heman: Bukia, Matania, Uziel, Shebuel, Yerimot, Hanania, Hanani, Eliata, Gidalti, Romameti-Ezer, Yoshebekasha, Maloti, Hotir na Mahaziot.

⁵ Ala so kue ayeke amolenge ti Heman, zo ti bango nda ti aye na gbia si lo yeke fa ngangu ti lo. Nzapa amu na Heman amolenge-koli baleoko na osio na amolenge-wali ota.

⁶ Ala kue ayeke he bia na ya ti kota da ti KOTA GBIA na gbe ti babâ ti ala si ala yeke pika na gbe ni awen so ayeke toto, akete kundi na akundi. Ala yeke sara kua ni na gbe ti Asaf, ti Yedutun na ti Heman, alingbi na yanga so gbia amu.

⁷ Ala so a fa kode ti hengo bia ti sepela KOTA GBIA na ala si ala hinga ni nzoni, ala na a-ita ti ala, wungo ti ala kue ayeke 288.

⁸ A bi mbeni ye ti hinga lege so ala yeke sara na kua ni: ataa akota zo, wala akete zo, ataa azo so ahinga ye nzoni wala ala so angba ti manda ye, a sara kangbi na popo ti ala pepe.

^9-31 So ayeke iri ti amakonzi ti abongbi oko oko so a bi mbeni ye si a soro ala: 1. Joseph, molenge ti Asaf. 2. Gedalia 3. Zakur 4. Isri 5. Netania 6. Bukia 7. Yesarela 8. Yeshaya 9. Matania 10. Shimei 11. Azarel 12. Hashabia 13. Shubael 14. Matitia 15. Yeremot 16. Hanania 17. Yoshebekasha 18. Hanani 19. Maloti 20. Eliata 21. Hotir 22. Gidalti 23. Mahaziot 24. Romameti-Ezer. Makonzi oko oko abongbi na ambeni zo ti sewa ti lo si na ya ti bongbi oko oko, azo ayeke baleoko na use.