1 Mbai 18 - Mbeti ti Nzapa - Tënë so amu fini

David aso benda na ndö ti awato ti lo

¹ Na pekoni, David ahon ndö ti azo ti Filistii na bira, lo zia kamene na le ti ala. Lo mu gbata ti Gat na akete kodro so ayeke na tere ni na maboko ti azo ti Filistii.

² Lo hon nga ndö ti azo ti Moab na bira, ala ga azo ti gbe ti lo si ala yeke futa lapo na lo.

³ David ahon nga ndö ti Hadadezer, gbia ti Soba na bira, Soba so ayeke na mbage ti gbata ti Hamat. Na ndembe ni, Hadadezer atara ti zia maboko na ndö ti akodro so ayeke na tere ti *bale ti Efrate.

⁴ David agbu apusu ti mbarata 1 000, azo ti kpengo na mbarata 7 000, asenge turugu 20 000. Lo fâ akamba ti gere ti ambarata so ayeke kpe na pusu, me lo bata ambeni mbarata ni 100 ndali ti lo wani.

⁵ Azo ti Sirii so aduti na Damas aga ti mu maboko na Hadadezer, gbia ti Soba; me David ahon ndö ti ala na bira si lo fâ ala 22 000.

⁶ David azia agovoronere na ndö ti ala, ala ga azo ti gbe ti lo si ala yeke futa lapo na lo. *KOTA GBIA asara si David aso benda na ndö ti awato ti lo na ndo so kue lo yeke gue daa.

⁷ David amu *avala ti aturugu ti Hadadezer so a sara na lôro si lo gue na ni na Jérusalem.

⁸ Lo mu nga gba ti bengba wen so ayeke na Tibat na Kun, agbata use ti kodro-gbia ti Hadadezer. Na pekoni, Salomon amu bengba wen ni si lo leke na mbeni ngbongboro sembe, angbongboro yongoro gere ti da nga na aye nde nde so a sara na bengba wen.

⁹ Tou, gbia ti Hamat ama a tene, David ahon ndö ti aturugu kue ti Hadadezer, gbia ti Soba, na bira.

¹⁰ Lo tokua molenge ti lo ti koli Hadoram na David, ti bara lo na ti gonda lo, ngbanga ti so lo sara bira na Hadadezer si lo hon ndö ti lo. Biani, Hadadezer ayeke wato ti Tou. Lo tokua nga na David aye nde nde so a sara ni na lôro, na wen ti nginza nga na bengba wen.

¹¹ Gbia David azia aye so nde ndali ti KOTA GBIA; lo bongbi ni na wen ti nginza nga na lôro so lo gbu na maboko ti amara kue: azo ti mara ti Edom, ti Moab, ti Amon, ti Filistii na ti Amalek.

¹² Abishai, so iri ti mama ti lo ayeke Seruya ahon ndö ti azo ti Edom na bira na popo-hoto ti Ingo; lo fâ ala 18 000.

¹³ Lo zia agovoronere na ndö ti azo ti Edom si ala ga azo ti gbe ti David. KOTA GBIA asara si David aso benda na ndö ti awato ti lo na ndo so kue lo yeke gue daa.

Iri ti akota zo ti kua ti David

¹⁴ David ale-gbia na ndö ti azo ti Israel kue; lo fâ ngbanga ti azo ti lo kue na legeni mbirimbiri.

¹⁵ Yoab, so iri ti mama ti lo ayeke Seruya, ayeke makonzi ti aturugu; Yoshafat, molenge ti Ahilud ayeke wabatango-ambeti;

¹⁶ Sadok, molenge ti Ahitub, lo na Abimelek, molenge ti Abiatar ayeke awayango-sandaga; Shavesha ayeke wakuasu;

¹⁷ Benaya, molenge ti Yoyada ayeke makonzi ti azo ti Kereti na ti Peleti, azo ti batango gbia; amolenge ti David ayeke akota zo na tere ti gbia.