အွန်လိုင်း သမ္မာကျမ်းစာ

Ebùlù 1 - Mundani

Èngǎ̧ Mbɔ̧ɔ̧mà e tsè ane Waã tò

¹ È li ngu tê àfɨꞋa mbì, Mbɔ̧ɔ̧mà me tsàà bɔntu̧ bi bɔ me làꞋa èngǎ̧ tò abua bètǎt nyaꞋ ba a ngo̧ a ngò̧ ane balu̧ nyaŋ.

² Ka nè àfɨ̀Ꞌ yaa ngɔ̀ŋ tsìꞋa ndìa lìa la, tà tsiꞋi tsàà Waã vi tà me làꞋa abua ya. Waã mbɔŋ wu wòt wu tà tsě ane tò ngɨ̀ ngɔ̀ŋ yaa, mbɔ̂ nê taa tɨ̧ɨ̧ àtsəa èghɨ ègème la.

³ Ndɨ ènɨ̧ tò àa la, bê ngu wuê ndɨ ènɨ̧ Mbɔ̧ɔ̧mà àa la, tà bɔ mbê mè ngu mbɨ̀Ꞌɨ̀ Mbɔ̧ɔ̧mà naa la mɨ̧̂. Tà nɨ èngǎ̧ vi wu àa nkwèèla la ka nɨŋ mbà̧aã ngɔ̀ŋ ya. È li ngu àfɨꞋa tà nɨ àlo̧a zi shùù bòt bu bɔ̀ bakà kuꞋu a mbì Mbɔ̧ɔ̧mà la, tà gha a ègwet ntsèke àbâ àbualu̧ a Mbɔ̧ɔ̧mà Àtsèàngɔ̀ŋ.

Ènɨ̧ Waã Mbɔ̧ɔ̧mà

⁴ Mbɔ̧ɔ̧mà li ngɨ̀ tà tsè bɔntu̧ bi wuê mbɨ̀Ꞌɨ̀ èlen lu Mbɔ̧ɔ̧mà ŋa abua tò la e tsè è tɔb la.

⁵ Mbɔ̧ɔ̧mà bakà li mè shu abua wantu̧ vi kǒ nê, “À wu waã am; Laane e ngu Tǎt wè.” Tà kà li te mè shu abua wekǒ nê, “Maa nga wu tǎt tò, taa wu waã am.”

⁶ AfɨꞋa Mbɔ̧ɔ̧mà li ngua nkɨ tsàà Waã mbì vi a sitsǎꞋ la, tà mè nê, “Bɔntu̧ Mbɔ̧ɔ̧mà bàgème e bɔ ndɨ bɔ̀ɔ me wùꞋte atò la.”

⁷ Tà gha ane ànəa bɔntu̧ bi tà nê, “Mbɔ̧ɔ̧mà ghɨ̀ bɔntu̧ bi mbɨ̀Ꞌɨ̀ àfeme, mè ngɨ̀ bɔfàꞋ bi mbɨ̀Ꞌɨ̀ èwet àa nkòòla la.”

⁸ È bɔ è me wu ane ànəa Waã tò tà nê, “À wu Mbɔ̧ɔ̧mà, kèfɔ̧̀ wê ka li lɔ̀Ꞌɔ elìa. Àà mbà̧aã kèfɔ̧̀ wê wuê ane èlɨ è kùꞋù la.

⁹ Àà nkɔ̀ŋkà mènəè ntsɔ̧̀, mpààbà mènəè kàbɔ̀ŋ, eyaa wu àghɨa a ghɨ̂ ka Mmɔ̌ wu e ngu Mbɔ̧ɔ̧mà wê la e ndɔ̀ɔ̀lè àwê, ŋà àwê mèngùꞋte è tsě me bèshu̧ bè la.”

¹⁰ Mbɔ̧ɔ̧mà ghɨ̀ ale mè nê, “Àwɔ̀ Lefɨ̀Ꞌ, mènəè li me laꞋ nê nàà mbùꞋà, à ghɨ̀ ngɔ̀ŋ yaa, mè ngɨ̀ ègwet wuê a èlɨ mbɔŋ ane èbu bê.

¹¹ Naa li me wu àfɨ̀Ꞌ àko èghɨ ngaa è ka tsi nguê, ka aa li ewu ane àlia nè àlia, èghɨ mbɔŋ aa li lènè ègème mbɨ̀Ꞌɨ̀ ndǐ.

¹² Aa li bɔte bùà mbɨ̀Ꞌɨ̀ wòt nàa mbɔ̀ta ndǐ la, mè ngu ekubte bùà mbɨ̀Ꞌɨ̀ bɔ̀ɔ nkùbta ndǐ la. Ka àà kà kùbte, à kà wu li lène.”

¹³ Mbɔ̧ɔ̧mà te bakà shu abua wantu̧ vi kǒ nê, “Tseke àbâ àbualu̧ am tè e ngɨa ngɨ̀ à tsite èka bè a ègwet bɔmbù̧ bê.”

¹⁴ Bɔntu̧ Mbɔ̧ɔ̧mà bu wu anè ghàà? Wu fote tèa faꞋa abua Mbɔ̧ɔ̧mà la. Tà tsàà wɔb nê bɔ̀ me tɨŋe bòt bu bɔ̀ɔ li ebɔ mèmpème la.

« အရင်

နောက်တစ်ခု »

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ