အွန်လိုင်း သမ္မာကျမ်းစာ

3 Jɔ̌n 1 - Mundani

¹ Letà Wajûŋ ayɔɔ bòt Yesò, Abua Gayɔ̀s wu màa nkɔ̀ŋkà nkàà nkûŋ yu ane ànəa Mbɔ̧ɔ̧mà la.

² Ngule shu̧ yaã, maà ntsàꞋtà nê mènəè mê ègème me ghȩ̀ȩ̀ne ntsɔ̧̀, à mě me nèèta nkwèèla, wuê mbɨ̀Ꞌɨ̀ mâ ko nê àà nkwèèla ane mènəè Mbɔ̧ɔ̧mà la.

³ E ndi ntaꞋa wùꞋtè am ndɨ bɔnyɨ ba ko ayɔɔ bòt Yesò, e li nkɨ̀Ꞌɨ̂ a si ŋàa shua am ndɨ àa ntsèka wuê mbɨ̀Ꞌɨ̀ èngǎ̧ Mbɔ̧ɔ̧mà e kɨa la, mè ndâ me ghɨ̀ mènəè nkûŋ la.

⁴ Ànəa ko a ntsě betsiꞋa a bɔ̀ am nyaŋ tè ntsè ndɨ mâ zə nê, bɔ̧ bɔ̧ aà ngɨ̀à mènəè nkûŋ la.

Èngǎ̧ enɨ wùꞋte a Gayɔ̀s

⁵ Ngule shu̧ yaã, mâ ye nê àà ndâ mbà̧à̧ bɔnyɨ ba bu è wû bòt Yesò la ntsɔ̧̀, fɔ̀ɔ̀le nê èbe bɔ̀ wu bègɨ̧̀ la.

⁶ Bɔ kɨꞋɨ̀ ntaꞋa làꞋa ndɨ àa nkɔ̀ŋkà bòt la abua bòt chɔsì ko bu a si ŋàa la. Shu̧ yaã, tɨŋe awɔb ane lèghȩ̀ȩ̀nè wɔb ndɨ àa bɔ̌ a Mbɔ̧ɔ̧mà la.

⁷ Ko nê, bòt baa e li me gha a lèghȩ̀ȩ̀nè wɔb ane ànəa Yesò Klistò ale, bɔ̀ ka bɨ̧ɨ̧nè enɨ àghɨa ko a dzəâ abua bòt kà wu bòt Yesò la.

⁸ Ale, bàa bòt Yesò e bɔ̂ ndɨ bàa tɨŋe bòt baa mbɨ̀Ꞌɨ̀ ezì àbu ba tò ba ane àfàꞋ yu bɔ̀ɔ fàꞋà a màndaꞋa èngǎ̧ nkûŋ la.

Dìòtèlefès bɔ̂ Dèmetulùs

⁹ E ndi shɨ àkatè abua bòt chɔsì bu abàꞋ ŋu la, ka Dìòtèlefès tù̧u̧ eyute ànəa e shua la, ndɨ̀ wu tàa nkɨà nê ye wu ewu àtsəa waa waa la.

¹⁰ Maa me ghɨ̀ tê nkɨ̀Ꞌɨ̂, ka ndɔ̀kè mènəè ègème tà ghɨ̀ la, fɔ̀ɔ̀le ne èbɨꞋte ènəê tà shu ane yaã, nè mèfà̧ tàa ndàꞋà la. Eyaa ntsě ndàꞋà mènəè tàa ngɨ̀à la. Bɔnyɨ ba àa ngɨ̀ bɔ̀ kɨꞋɨ, tà kà sèè awɔb, mè me kele fɔ̀ɔ̀la bòt bu nkɨ esèe àwɔb la, tè fəèà àwɔb a èbem chɔsì.

¹¹ Ngule shu̧ yaã, à ka me fɨŋe bòt bu bɔ̀ɔ ngɨa kàbɔ̀ŋ la. Me fɨŋe wuê è bu bɔ̀ɔ ngɨa ntsɔ̧̀ la. Waa waa tàa ngɨ̀à ntsɔ̧̀ la wu wòt Mbɔ̧ɔ̧mà, ka wòt tàa ngɨ̀à kàbɔ̀ŋ la, wu wòt kà ko a Mbɔ̧ɔ̧mà.

¹² È wu a Dèmetulùs, ko waa waa nàà ndàꞋà ntsɔ̧̀ adù̧ tò. Mènəè tò mè me nyɨꞋte nê wu nkûŋ. Bàa mbɔŋ e ye mɨ̧̂ mè me shu nê tàà ngɨa ntsɔ̧̀, à mè nko nê baa kà laꞋa mèfà̧.

Èngà̧ enɨ lìa

¹³ Mâ taꞋa bɔ mènəè mâ wu shu awê la, ka è nka wu eshɨ a èbem àkatè.

¹⁴ Maà nkwàꞋtà wuê nê, è bele yàŋe kɨꞋɨ eye awê, baa mù mènəè mbɔŋ ane ètsəê.

¹⁵ Àlàŋkè à wu ne nɨ̧̀. Bèshu̧ ba a si ŋàa bàgème aà ntsàꞋtà awê. TsàꞋtè bèshu̧ ba bu a ebàꞋ ŋu la àtsə, àtsə.

« အရင်

နောက်တစ်ခု »

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ