Banzembo 98 - Mokanda na Bomoi

Nzembo 98 Nzambe azali koya kosambisa mabele

1 Nzembo.

¹ Nzembo. Boyembela Yawe nzembo ya sika, pamba te asalaka makambo ya kokamwa ! Na nguya mpe na bokonzi na Ye ya bonzambe, alongaki.

² Yawe atalisaki elonga na Ye, amonisaki bosembo na Ye epai ya bikolo.

³ Akanisaki bolingo mpe bosembo na Ye mpo na libota ya Isalaele. Kino na suka ya mokili, elonga ya Nzambe na biso emonanaki.

⁴ Mokili mobimba, bobetela Yawe maboko, boyemba banzembo ya esengo mpe bobeta mindule !

⁵ Bobetela Yawe lindanda, boyembela Ye banzembo na lokito ya nzenze !

⁶ Bobeta maboko liboso ya Yawe, Mokonzi, na lokito ya bakelelo mpe ya maseke.

⁷ Tika ete ebale monene elongo na nyonso oyo ezali kati na yango, mokili mpe bavandi na yango, bapesa lokito !

⁸ Tika ete bibale ebeta maboko mpe bangomba nyonso eganga na esengo

⁹ liboso ya Yawe, pamba te azali koya kosambisa mabele ! Akokata makambo na yango na bosembo.