Banzembo 65 - Mokanda na Bomoi

Nzembo 65 Opesaka bofuluki

¹ Wuta na buku ya mokambi ya bayembi. Nzembo ya Davidi.

² Mpo na Yo Nzambe, bozangi makelele ezali lokumu, kati na Siona ; mpe mpo na Yo, ndayi ekokokisama.

³ Yo oyo oyokaka mabondeli, bato nyonso bakoya epai na Yo.

⁴ Kilo ya bambeba eleki makasi mpo na ngai ; kasi Yo, olimbisaka masumu na biso.

⁵ Esengo na moto oyo oponi mpe obulisi mpo ete avanda kati na lopango na Yo. Tokotonda na bolamu ya Ndako na Yo, Tempelo na Yo ya bule.

⁶ Nzambe Mobikisi na biso, oyanolaka biso na bosembo, na nzela ya biloko ya somo ; Ozali elikya ya mokili mobimba mpe ya bibale minene.

⁷ Alendisaka bangomba, na nguya na Ye ; atondi na mpiko.

⁸ Akitisaka makelele ya bibale minene, makelele ya bambonge na yango mpe makelele ya bikolo.

⁹ Bato oyo bavandaka na basuka ya mokili babangaka tango bamonaka bikamwa na Yo ; osalaka ete este mpe weste eganga na esengo.

¹⁰ Opambolaka mabele, ofulukisaka yango, otondisaka yango na bozwi. Otondisaka moluka ya Nzambe na mayi, obongiselaka bato ble, pamba te otondisaka mayi mpo na yango.

¹¹ Olekisaka mayi kati na mikala, okweyisaka mipiku ya mabele, osopelaka mabele mayi mpe opambolaka milona.

¹² Opambolaka mobu na bolamu na Yo, mpe banzela mike oyo olekelaka ebotaka ebele.

¹³ Bilanga ya esobe etondaka na bilei, mpe bangomba mike etondaka na esengo.

¹⁴ Bilanga etondaka na bameme mpe bantaba ; mabwaku etondaka na ble, egangaka na esengo mpe eyembaka.