Banzembo 46 - Mokanda na Bomoi

Nzembo 46 Nzambe azali ekimelo na biso

¹ Nzembo ya bana ya Kore. Wuta na buku ya mokambi ya bayembi. Eyembamaki na mongongo moke ya bilenge basi.

² Mpo na biso, Nzambe azali ebombamelo mpe eyekamelo, azali lisungi oyo ezangaka te na tango ya pasi.

³ Yango wana, tobangaka te ata soki mabele eningani, bangomba ekweyi kati na ebale monene ;

⁴ ata soki bambonge na yango etelemi, ebimisi fulufulu mpe eningisi bangomba.

⁵ Ezali na ebale moko oyo mayi na yango esepelisaka engumba ya Nzambe oyo eleki bule kati na bivandelo ya Ye-Oyo-Aleki-Likolo.

⁶ Nzambe azali kati na yango, ebukani te ; Nzambe asungaka yango wuta na tongo makasi.

⁷ Bikolo ezali kotomboka, bamboka ezali kokweya ; kasi Nzambe atomboli mongongo na Ye, mpe mabele ebukani.

⁸ Yawe, Mokonzi ya mampinga, azali elongo na biso ; Nzambe ya Jakobi azali ekimelo na biso.

⁹ Boya kotala misala ya Yawe, makambo minene oyo asalaka kati na mokili.

¹⁰ Asilisaka bitumba kino na basuka ya mokili, akataka batolotolo, abukaka makonga mpe atumbaka na moto bashar ya bitumba.

¹¹ Alobaki : « Bovanda kimia, boyeba ete ngai nazali Nzambe ; nakonzaka bikolo, nakonzaka mpe mokili. »

¹² Yawe, Mokonzi ya mampinga, azali elongo na biso ; Nzambe ya Jakobi azali ekimelo na biso.