Banzembo 29 - Mokanda na Bomoi

Nzembo 29 Mongongo ya Yawe

1 Nzembo ya Davidi.

¹ Nzembo ya Davidi. Bopesa Yawe, bino ba-anjelu ya Nzambe, bopesa Yawe nkembo mpe makasi.

² Bopesa Yawe nkembo oyo ekoki na lokumu ya Kombo na Ye ; bogumbamela Yawe kati na kongenga ya bosantu na Ye.

³ Mongongo ya Yawe eyokani na likolo ya mayi, Nzambe ya nkembo azali koleka elongo na lokito, Yawe azali koleka elongo na lokito na likolo ya mayi minene.

⁴ Mongongo ya Yawe ezali na nguya ; mongongo ya Yawe ezali na lokumu mingi.

⁵ Mongongo ya Yawe ebukaka banzete ya sedele ; Yawe abukaka banzete ya sedele ya Libani.

⁶ Apumbwisaka Libani lokola mwana ngombe, apumbwisaka Sirioni lokola mwana ya mpakasa.

⁷ Mongongo ya Yawe ebimaka elongo na bakake ya moto.

⁸ Mongongo ya Yawe elengisaka esobe ; Yawe alengisaka Esobe ya Kadeshi.

⁹ Mongongo ya Yawe esalaka ete mboloko ebota, esalaka mpe ete zamba etikala pamba. Kati na Tempelo ya Yawe, nyonso egangaka : « Nkembo ! »

¹⁰ Yawe avandaki na Kiti ya Bokonzi na likolo ya mpela ; Yawe avandi na Kiti ya Bokonzi lokola Mokonzi mpo na libela.

¹¹ Yawe apesaka bato na Ye makasi ; Yawe apambolaka bato na Ye na nzela ya kimia.