Zaburi 76 - Motingʼo Loko Manyien

Zaburi 76

Kuom jatend wer. Gi gig wer man-gi tondegi. Zaburi mar Asaf. Wer.

¹ Nyasaye en rahuma e piny Juda, kendo nyinge duongʼ e piny Israel.

² Hembe nitie Salem kar dakne ni Sayun.

³ Kanyo ema e oturoe aserni makakni, kaachiel gi okumbni gi ligengni, ma gin gig lweny. Sela

⁴ Duongʼ mari ler okwako kendo iyombo gode momew gi kit le mayoreyore.

⁵ Yawuowi madongo mojingʼ osema gik mane giyako koro ginindo nindogi mogik; kendo onge jolwenygo kata achiel, manyalo tingʼo kata mana bade.

⁶ Nikech kwer misekwerogigo, yaye Nyasach Jakobo omiyo faras gi gari moywayo ochungʼ kar tiendegi.

⁷ In kendi ema onego oluori. Koso en ngʼa manyalo chungʼ e nyimi ka mirima omaki?

⁸ Ne ingʼado bura gie polo, mi piny ne luoro omako molingʼ thi.

⁹ Kane ia malo mondo ingʼad bura, yaye Nyasaye, mondo ikony ji duto mawinjo marach e piny. Sela

¹⁰ Kuom adier, mirima ma in-go gi ji, keloni pak, kendo miyo joma otony ne mirimbi ritore.

¹¹ Singri ne Jehova Nyasaye ma Nyasachi, kendo chop singruokgo; bende jopinje duto mokiewo kodi, okel mich ne Jal monego ji luor.

¹² Ochodo chuny jotelo, kendo ruodhi duto mag piny oluore.