Zaburi 62 - Motingʼo Loko Manyien

Zaburi 62

Kuom jatend wer. Mar Jeduthun. Zaburi mar Daudi.

¹ Chunya yudo yweyo kuom Nyasaye kende; warruok aa kuome.

² En kende ema en lwandana kendo warruokna; en e ohingana, onge gima biro bwoga.

³ Ubiro siko kumonjo ngʼat achielni nyaka karangʼo? Angʼo momiyo uduto unywakone mondo ugoye piny? En ngʼat machalo mana gi chiel mayiengni madwaro mukore.

⁴ Giramo ni nyaka to gigole oko kama entie e duongʼne; miriambo ema morogi. Dhogi gigwedhogo ji, to gi ei chunygi to gikwongʼo ji. Sela

⁵ Yud yweyo, yaye chunya, kuom Nyasaye kende; genona aa mana kuome.

⁶ En kende ema en lwandana kendo warruokna; en e ohingana; onge gima biro bwoga.

⁷ Warruok mara gi luor ma ayudo aa kuom Nyasaye; en e lwandana manyalo duto, en e kar pondona.

⁸ Un ji, genuru kuome kinde duto; olneuru oko gik manie chunyu, nikech Nyasaye e kar pondo marwa. Sela

⁹ Joma nipiny gin mana muya nono; joma ni malo gin mana miriambo; ka opimgi e ratil, to gin nono; gin duto gin mana muya nono.

¹⁰ Kik igen kuom mwandu moma ji kata isungri kuom gik mokwal; kata bed ni mwandugi medore to kik iket chunyi kuomgi.

¹¹ Nitie gimoro achiel ma Nyasaye osewacho, chutho nitie gik moko ariyo ma asewinjo gi ita: ni in, yaye Nyasaye, in ratego,

¹² kendo ni in, yaye Ruoth Nyasaye, ihero ji. Kuom adier, ibiro chiwo pok ne ngʼato ka ngʼato kaluwore gi gima osetimo.