Zaburi 52 - Motingʼo Loko Manyien

Zaburi 52

Kuom jatend wer. Maskil mar Daudi. Kane noyudo Doeg ja-Edom nosedhi ir Saulo kendo onyise niya, “Daudi osedhi e od Ahimelek.”

¹ Angʼo momiyo isungori kuom tim marach, yaye ngʼat maratego? Angʼo momiyo isungori odiechiengʼ duto, in ma in gir wichkuot e nyim Nyasaye?

² Ichano timbe midwaro wuondogo ji, lewi bende chano gik modwaro hinyogo ji; kendo lewino chalo gi wembe mabith.

³ Ihero rach moloyo ber, miriambo mitni moloyo wacho adiera. Sela

⁴ Ihero weche duto machwanyo ji, yaye in lep mohero wuondni!

⁵ To Nyasaye biro tieli piny matieki chuth nyaka chiengʼ; obiro yudhi mi oyiechi oko e hembi; obiro pudhi mi ogoli e piny joma ngima. Sela

⁶ Joma kare biro neno mano mi gibed maluor; gibiro nyiere kagiwacho ni,

⁷ “Koro neyeuru ngʼatno, mane ok okawo Nyasaye obedo kar pondo mare, to nogeno mana kuom mwandune mathoth kendo notieko joma moko mondo eka omed bedo gi teko!”

⁸ An to achalo yiend zeituni madongo maber e od Nyasaye; ageno kuom hera ma ok rem mar Nyasaye manyaka chiengʼ.

⁹ Abiro paki nyaka chiengʼ kuom gima isetimo; abiro paki e nyim jogi maler. Abiro keto geno mara kuom nyingi, nikech nyingi ber.