Zaburi 41 - Motingʼo Loko Manyien

Zaburi 41

Kuom jatend wer. Zaburi mar Daudi.

¹ Ngʼama paro joma ok nyal en jahawi; Jehova Nyasaye rese ka chandruok omake.

² Jehova Nyasaye biro rite kendo biro miyo obed mangima; Jehova Nyasaye biro gwedhe e piny, kendo ok obi jwangʼe e lwet wasike.

³ Jehova Nyasaye biro rite e kitandane mar tuo midekre kendo obiro miyo oa malo e kitandane ka ohewore.

⁴ Ne awacho niya, “Yaye Jehova Nyasaye, kecha; changa, nikech aseketho e nyimi.”

⁵ Wasika wuoyo kuoma ka chunygi rach koda, kagiwacho niya, “Obiro tho karangʼo mondo nyinge olal chuth?”

⁶ Sa asaya ma ngʼato obiro nena, to owuondore ni owuoyo kuoma maber, to ei chunye to ofwambo weche, mondo okethgo nyinga eka oa odhi kendo okeyo wechego ne ji.

⁷ Wasika duto kuodho wach kuoma kaachiel kaka ginyalo hinya, chunygi paro gik maricho mogik mondo ohinya, kagiwacho niya,

⁸ “Tuo marach osekete piny; ok obi aa malo kama oninde.”

⁹ Koda ka osiepna mane ageno kuome, ngʼat mane chiemo koda, bende osendhoga.

¹⁰ To in, yaye Jehova Nyasaye, yie ikecha; chunga malo, mondo achulgi.

¹¹ Angʼeyo ni chunyi mor koda, nimar jowasika ok loya.

¹² Itingʼa malo nikech timna makare kendo ichunga e nyimi nyaka chiengʼ.

¹³ Pak ne Jehova Nyasaye, ma Nyasach Israel, nyaka chiengʼ kendo nyaka chiengʼ. Amin kendo Amin.