Zaburi 20 - Motingʼo Loko Manyien

Zaburi 20

Kuom jatend wer. Zaburi mar Daudi.

¹ Mad Jehova Nyasaye dwoki ka in e chandruok; mad nying Nyasach Jakobo riti.

² Mad oorni kony moa kare maler mar lemo kendo omiyi kony moa Sayun.

³ Mad opar misengni magi duto kendo oyie gi misengini miwangʼo pep magi. Sela

⁴ Mad omiyi gima chunyi gombo kendo omi chenro magi duto odhi maber.

⁵ Wabiro kok gimor ka ilocho kendo wabiro tingʼo bendechwa malo e nying Nyasachwa. Mad Jehova Nyasaye chiw gik moko duto mikwaye.

⁶ Koro angʼeyo ni Jehova Nyasaye reso ngʼate mowir; odwoke gie kare maler mar lemo manie polo, gi teko ma waro ji mar lwete ma korachwich.

⁷ Jomoko ogeno kuom gechegi to jomoko kuom faresegi, to wan to wageno kuom nying Jehova Nyasaye, ma Nyasachwa.

⁸ Gibiro lwar e chonggi mi gipodhi, to wan wabiro aa malo mi wachungʼ motegno.

⁹ Yaye Jehova Nyasaye, reswa ruoth! Dwokwa ka waluongi!