Zaburi 137 - Motingʼo Loko Manyien

Zaburi 137

¹ E bath aore mag Babulon ne wabet piny kendo ne waywak kane waparo Sayun.

² Ne wangʼawo thumbewa ewi omburi mane ni kanyo,

³ nimar joma ne omakowa nokwayowa wende kane wan kanyo, joma nesandowa nochunowa ni wawernegi wende mor; negiwachonwa niya, “Wernwauru achiel kuom wende Sayun!”

⁴ Ere kaka wanyalo wero wende Jehova Nyasaye kapod wan e piny ma wendo?

⁵ Ka dipo ni wiya owil kodi, yaye Jerusalem, to mad lweta ma korachwich wiye wil gi tichne.

⁶ Mad lewa moki e danda ka dipo ni ok apari, ka dipo ni ok aketo chunya kuomi, yaye Jerusalem, morna maduongʼ mogik.

⁷ Parie gima ne jo-Edom otimo, yaye Jehova Nyasaye, parie gima negitimo chiengʼ mane Jerusalem opodho. Ne gikok matek niya, “Mukeuru ogoye piny. Mukeuru ogore piny gi mise mare duto!”

⁸ Yaye nyar Babulon, in mochanni kethruok, ngʼama nochuli kuom gima isetimonwa en jahawi,

⁹ ngʼat manomak nyithindi mayom mi gogi piny e lwendni en jahawi.