Zaburi 115 - Motingʼo Loko Manyien

Zaburi 115

¹ Ok wan, ok wan, yaye Jehova Nyasaye, to In ema nyingi oyud duongʼ, nikech herani kod adierani.

² Angʼo momiyo ogendini penjo niya, “Nyasachgino ere?”

³ Nyasachwa ni e polo; otimo gimoro amora mohero.

⁴ To nyisechegi mopa gin fedha gi dhahabu, molos gi lwet dhano.

⁵ Gin gi dhogi, to kata kamano ok ginyal wuoyo, gin gi wenge to ok ginyal neno gimoro.

⁶ Gin gi it, to ok ginyal winjo wach, kendo gin gi um, to ok ginyal ngʼwecho.

⁷ Gin gi lwetegi, to ok ginyal mulo, kendo gin gi tiende to ok ginyal wuotho, bende ok ginyal kata temo loso gi dwondgi.

⁸ Joma losogi nobed machal kodgi, kendo joma oketo genogi kuomgi bende biro chalo kodgi.

⁹ Yaye dhood jo-Israel, genuru kuom Jehova Nyasaye, En e konyruokgi kendo okumbagi.

¹⁰ Yaye dhood joka Harun, genuru kuom Jehova Nyasaye, En e konyruokgi kendo okumbagi.

¹¹ Un joma omiyo Jehova Nyasaye luor, keturu genou kuome, En e konyruokgi kendo okumbagi.

¹² Jehova Nyasaye parowa kendo obiro gwedhowa; obiro gwedho dhood Israel, obiro gwedho dhood joka Harun,

¹³ obiro gwedho joma oluoro Jehova Nyasaye, ji ajia kod joma igeno.

¹⁴ Mad Jehova Nyasaye mi imedri, in kaachiel gi nyithindi.

¹⁵ Mad iyud gweth moa kuom Jehova Nyasaye, jachwech polo gi piny.

¹⁶ Polo malo mogik en mar Jehova Nyasaye, to piny to osechiwo ne dhano.

¹⁷ Joma osetho ok ema pak Jehova Nyasaye, joma oseiki molingʼ thi e bur ok pake;

¹⁸ en wan ema wadendo Jehova Nyasaye tinende kendo nyaka chiengʼ. Pakuru Jehova Nyasaye!