Zaburi 108 - Motingʼo Loko Manyien

Zaburi 108

Wer. Zaburi mar Daudi.

¹ Chunya ochungʼ mongirore, yaye Nyasaye; abiro paki gi wer kendo abiro loso mamit gi chunya duto.

² Chiewuru, un orutu gi nyatiti! Abiro chiewo kogwen.

³ Abiro paki e dier ogendini, yaye Jehova Nyasaye, abiro werni e dier ogendini.

⁴ Nikech herani maduongʼ chopo nyaka e polo; kendo adiera mari chopo nyaka ewi lwasi.

⁵ Nyingi mondo otingʼ malo moyombo polo, yaye Nyasaye, mad duongʼ mari opongʼ piny duto.

⁶ Reswa kendo konywa gi lweti ma korachwich, mondo joma ihero ogol e chandruok.

⁷ Nyasaye osewuoyo gie kare maler kowacho niya, “Abiro pogo Shekem ne ji, kendo abiro pimo ne ji Holo mar Sukoth.

⁸ Gilead en mara, Manase bende mara, Efraim en oguta mar lweny, to Juda en osimbona mar loch.

⁹ Moab en besen mara mar luok, to Edom e kama amoe wuochena; Filistia ema akoke ka aseloyo lweny.”

¹⁰ En ngʼa mabiro kela e dala maduongʼ mochiel motegno? En ngʼa mabiro telona nyaka Edom?

¹¹ Donge in ema isedagiwa, yaye Nyasaye, kendo tinde ok idhi gi jolwenjwa e lweny?

¹² Miwa kony mondo walo wasikwa, nikech kony mar dhano onge tich.

¹³ Wabiro loyo lweny ka Nyasaye nikodwa, kendo obiro nyono wasikwa piny.