Tim jo-Lawi 18 - Motingʼo Loko Manyien

Okwer timbe mag terruok

¹ Jehova Nyasaye nowacho ne Musa niya:

² “Wuo gi jo-Israel kendo iwachnegi ni, ‘An e Jehova Nyasaye ma Nyasachu.

³ Kik utim timbe ma jo-Misri mane udak e diergi timo kendo kik timbe moko mag jo-Kanaan makoro aterou e diergi yudre kuomu. Bende kik uluw timbe ma gitimo.

⁴ Nyaka urit chikena kendo luwuru yorena, nikech an Jehova Nyasaye ma Nyasachu.

⁵ Rituru yorena kod chikena, nimar ngʼat moluwogi nobed mangima kuomgi. An e Jehova Nyasaye.

⁶ “ ‘Kik ngʼato terre gi dhako moluongo ni watne. An e Jehova Nyasaye.

⁷ “ ‘Kik ikuod wi wuonu kuom terruok gi chiege, nikech en minu.

⁸ “ ‘Kik iterri gi chi wuonu, nikech kitimo kamano to ikelone wuonu wichkuot.

⁹ “ ‘Kik iterri gi nyaminu mahie, kata nyameru maka wuonu machielo kata maka minu machielo, bedni onywole e dala kae, kata kamoro machielo.

¹⁰ “ ‘Kik iterri gi nyakwari maka wuodi kata maka nyari, nikech kitimo kamano to ikelo wichkuot ni in iwuon.

¹¹ “ ‘Kik iterri gi nyaminu moa e ot machielo, nikech en nyaminu.

¹² “ ‘Kik iterri gi nyamin wuonu nikech en wayu.

¹³ “ ‘Kik iterri gi nyamin mamau nikech en bende en mamau.

¹⁴ “ ‘Kik igomb terori gi chi owadgi wuonu nikech en minu, kendo mano kelo wichkuot ne wuonuno.

¹⁵ “ ‘Kik iterri gi chi wuodi nikech en maru, ok oyieni mondo itim kamano.

¹⁶ “ ‘Kik iterri gi chi owadu nikech mano nyalo kelo wichkuot ne owaduno.

¹⁷ “ ‘Kik iterri gi nyako kaachiel gi min-gi. Kik iterri gi nyakware ma ka wuode kata maka nyare, nikech gin wede dhakono. Mano en tim anjawo.

¹⁸ “ ‘Kik ikend nyamin chiegi mondo obed nyieke ma iriwri kode ka nyamin pod ngima.

¹⁹ “ ‘Kik iterri gi dhako manie kindene mar neno malo.

²⁰ “ ‘Kik iterri gi chi ngʼama udakgo mokiewo, dipo ka omiyo ibedo mogak.

²¹ “ ‘Kik ichiw nyathini moro amora ni nyasaye manono miluongo ni Molek, nimar ok onego iketh nying Nyasaye. An e Jehova Nyasaye.

²² “ ‘Kik iterri gi dichwo wadu nikech mano en tim makwero.

²³ “ ‘Kik iterri gi chiayo nikech mano miyo ibedo mogak. Dhako bende kik yie mondo chiayo oterre kode, nikech mano en gima kwero.

²⁴ “ ‘Kik udwanyru kutimo timbe ma kamago nikech timbego ema ogendini mabiro riembo e nyimu ne timo.

²⁵ Kata mana piny bende nobedo mogak, omiyo ne akumogi nikech richo mag-gi, kendo piny nongʼogo joma nodakie iye.

²⁶ To nyaka urit yorena kod chikena. Onge ngʼato kuomu manotim timbe makwerogo kata obed ja-Israel kata jadak e dieru,

²⁷ nikech magi e timbe ma joma nodak e pinyni kapok ubiro notimo kendo negiketho pinyni.

²⁸ To ka udwanyo pinyno, to ngʼeuru ni onyalo ngʼogou oko mar oganda mane okwongonu dake kane gidwanye.

²⁹ “ ‘Jogo duto matim makwerogo noyud e ngimagi, ginto nyaka golgi oko ei ogandagi.

³⁰ Emomiyo luwuru chikena kendo ritreuru ma kik uluw timbe makwero mane joma odak e pinyni otimo kapok ubiro, mondo kik ubed mogak. An e Jehova Nyasaye ma Nyasachu.’ ”