Methelokên 7 - Methelokên Hezretê Silêman 1947

Bir 7

¹ Kurê min, qedrê gotinên min bigire û bala xwe bide pendên min.

² Bide pey pendên min, tu pê berxurdar bibî û pendên min bila bibin bîbokên çavên te.

³ Tu wan bi tiliyên xwe ve girêbide û wan li ser depên dilê xwe binivîse.

⁴ Ji şehrezayiyê re bibêje: tu xwîşka min î, û bila bîrewerî bibe hevala te,

⁵ Da ko tu ji jina xerîba bête parastin, ji jinikekê ko gotinên wê tamşîrin in.

⁶ Ez li pêşiya pencera mala xwe de bûm û min ji derabê mêze dikir.

⁷ Di nav serseman de, der nav xortan, çavê min bi lawikekî bêhiş ket.

⁸ Yê ko di kolanê re derbaz dibû, nizingî quncika ko lê yek ji wan jinên xerîban sekinî bû û rûyê xwe dida ber bi xaniyê wê ve û hêdî, hêdi diçû;

⁹ Êvar bû, dema hîngurî, di nav şevê de, der nav tarîtiyê.

¹⁰ Û binêr; jinikeke ko dilê wê têr zexel û mîna qehbikan cil li xwe kirî bû, nîzingî lê kir.

¹¹ Jinikeke devtejîgotin û riswa û ya ko piyên di wê ni karin li mal bimînin;

¹² Bihnek di nav kûçe û kolanan de, gavek der gasinan, û di nîzingî hemî guşeyan de çavnêriyê dikir.

¹³ Wê ew girt, û maçî kir û bê ar jê re got.

¹⁴ Min nezrek kiri bû, û îro min ev anî cih.

¹⁵ Ji ber vê yekê, ez ji mal derketim û hatim pêrgîna te, ji bona dîtina rûyê te û min tu peyda kirî.

¹⁶ Min textê xwe kok kir, bi mêzer û mexfûrên Misrê yên çeleng;

¹⁷ Min nivîna xwe bi od û zimûrs û darçînê bihindar kir.

¹⁸ Were, em heta rojhelatî bi hevînê serxweş bibin û di nav kêfxweşiyê de, dilê xwe sar bikin.

¹⁹ Herwekî mêrê min ne li mal e û çûye derekê dûr.

²⁰ Xurcikeke peran bi xwe re biriye, ne niho, lê ko heyva nû derket wê vegere mala xwe.

²¹ Wê bi gotinên xwe ew xapand û bi lêvên xwe ên tamşîrîn ew kişand.

²² Ji nişka ve lawik ket pey wê, mîna gayekî ko diçe şerjêkirinê, weke dînekî ko diçe êşandinê.

²³ Heta çaxa ko tîrek di kezeba wî re derbaz bibe, mîna çûkekî ko xwe dawêje torê, û bê ko bihese ko pê jiyîna xwe datîne.

²⁴ Û niho, kurên min, min bibihîsin û guh bidin gotinên devê min.

²⁵ Bila, dilê te, meyildariya xaçereya jinikeke wilo me ke; li ser şopên di wê reya xwe winda me ke.

²⁶ Zehf in yên ko bi destê wê brîndar bûne; komek e yên ko bi destê wê hatine xeniqandin.

²⁷ Reya mirinê di mala wê re dibore û mirov jê dadikeve kortala miriyan.