Methelokên 4 - Methelokên Hezretê Silêman 1947

Bir 4

¹ Bibihisin, kurên min, pendên bavên xwe; û ta ko fêrî hikmet û zanînê bibin, bala xwe bidinê;

² Ez şîretine qenc didim we, dev ji pendên min bermedin.

³ Ez kurê bavê xwe bûm û kûrê deya xwe ê bitenê û ê delal

⁴ Wî ez hîn dikirim û digote min: berde, bila gotinên min bikevin dilê te, bide pey şîretên min û tu ê berxurdar bibî.

⁵ Bibe xwediyê zanîn û eqilmendiyê; gotinên devê min ji bîra me ke û rûyê xwe ji wan bamede.

⁶ Dev ji pendên min bermede, ew ê te bihemînin; hejî wan bike ew ê te biparêzin

⁷ Ev e destpêka şehrezayiyê: hikmet û zanînê bikesibîne û bila eqilmendî li ber dilê te, ji her tiştî şîrîntir bibe.

⁸ Tu wan bilind bigire; ew ê qedrê te bilind bikin û heke te ew himbêz kir, ew ê te bigihînin serfiraziyê:

⁹ Ew, taceke çeleng wê deyne ser serê te û pê eniya te zînetdar bike.

¹⁰ Bibihîse, kurê min, gotinên min bide hişê xwe, pê salên jiyîna te pir û bêtir bibin.

¹¹ Ez dikim reya eqilmendiyê pêş te bikim, ez dikim te bigihînim şîvereyên rastiyê.

¹² Da ko çaxa tu dimeşî gavên xwe bi rastî bavêjî û heke te baz da bi tu tiştî me kevî.

¹³ Şîretên min xweş bigire, dest ji wan bermede, wan biparêze ji ber ko ew in jiyîna te.

¹⁴ Me de ser xaçereyên mirovên bêkêr û me keve ser reya peyayên xerab.

¹⁵ Berde, bila ew tê de bimeşin, lê tu jê dûr keve û wêdetir here.

¹⁶ Ji ber ko wan heke xerabî ne kirin, ni karin razin û heke peyayek ne xistine erdê xew ji çavê wan direve;

¹⁷ Ew, nanê xirabiyê dixwin û şeraba zorkeriyê vedixwin.

¹⁸ Lê, şîvereya dilpakan mîna ronahiyê dibiriqe û rewşa wê heta nîvê rojê her û her bêtir dibe.

¹⁹ Lê, reya mirovên xerab qey tarî ye, û ew ni zanin diçin kû û bi çi tiştî wê bikevin.

²⁰ Kurê min, bala xwe bide gotinên min, guh bide gotarên di min.

²¹ Ew, bila dûrî çavên te ne bin; wan di kûrahiya dilê xwe de biparêze.

²² Ew, jiyîn e, ji bona yên ko ew peyda kirin; û ji bona laşê wan xweşî û saxelemî ye,

²³ Ji her tiştî bêtir guh bide dilê xwe, ji ber ko kaniyên jiyînê jê tên.

²⁴ Durûtiyê ji xwe dûr xe û gotinên nemerd ji lêvên xwe bavêje.

²⁵ Berde, bila çavên te rast bi rast li pêşiyê binêrin û çermên di wan bikevin ber te.

²⁶ Berde, bila piyên te bi serbestî pêş ve bikevin, bêşik wilo berve diçi;

²⁷ Ne ber bi aliyê rastê û ne jî ber bi aliyê çepê ve xwe xwîl me ke û piyê xwe ji xiraban bi guhêre.