Methelokên 25 - Methelokên Hezretê Silêman 1947

¹ Ev in hêj Methelokên Silêman, yê ko bi destê peyayê Ezekiyas, Qralê Cuhistanê; hatine berhev kirin.

² Mezinahiya Xwedê veşartina tişta ye; lê mezinahiya qrala kifşkirina wan e.

³ Ezman bilind in, erd kûr e, û qesda dilê Qralan na yên seh kirin.

⁴ Kefên zîvî jê hilîne; ji bona zîvker guldankek derdikeve.

⁵ Ji tenişta Mîra mirovên xerab hilîne; pê textê wî bi edaletê qaim dibe.

⁶ Di dîwana Mîran de me keve pêşiyê û cihê mezinan me gire.

⁷ Çêtir e ko ji te re bête gotin: were hilkêşe jor; û ne ko di pêşiya qral de qedrê te bête şkênandin û tu wê bi çavê xwe bibînî.

⁸ Bê giranî me be dawadarê tiştekî; ma heke qedrê te hate şkênandin tu ê çi bikî.

⁹ Bi xelkê re doz û dawa xwe bike; lê veşartiya mirovekî din eşkere me ke.

¹⁰ (Bide eqlê xwe), yê ko bihistiye heye ko lewman dike te û navê te dikare pê di nav xelkê de kêmqedir bibe.

¹¹ Gotineke bi rê mîna sêveke zêrîn li ser firaxeke zîv e.

¹² Tekdîrên mirovekî hikmetdar ji bona guhên hişyar weke guhar û gerdeniyine zêrîn in.

¹³ Qasidekî rast ji bona mirovê ko wî dişîne, mîna honikahiya berfê di meha paleyiyê de ye; pê rahetiya canê wî vedigere ve.

¹⁴ Yê ko pir dibêje û na yêne cih mîna ewr û bayên bê baran e.

¹⁵ Sebir erna qrala nerm dike, û zimanekî şîrîn hestiyan dişkînîne.

¹⁶ Ko te hingivî peyda kir li gora bihn û can bixwe; lê zêde me ke, da ko venereşînî.

¹⁷ Pir meçe nik cîrana; dikare ji te têr bibe û dawî ji te dikerihe.

¹⁸ Şahidê derewîn ji bona xelkê mîna tîr û rim û şûr e.

¹⁹ Di roja tengiyê de xwe bi bêbextekî girêdan weke diranekî şikestî an lingekî bêxeyr e.

²⁰ Di rojeke sar de xwe tazî kirin û li ser sodayê de sihik çawa ye; mirovê ko di pêşiya dilekî brîndar de berdolaviyan dibêje wilo ye.

²¹ Heke dijminê te birçî ye jê re nan bide; heke tihu e; avê deyn pêş wî.

²² Tu pê li ser serê wî agirine sor kom dikî û Xwedê li te wê vegerîne.

²³ Bayê kur baranê tîne û yê ko bi dizîka paşgotiniya dike xelkê dixeyidîne.

²⁴ Çêtir e ko mirov di binê barî de li gûşeyekê bimîne û bi jinikeke bedxû di malekê de rûmene.

²⁵ Xebereke rind ji welatekî dûr; mîna aveke sar ji bona peyayekî westiyayî ye.

²⁶ Mirovekî pak yê ko di pêşiya mirovekî xirab de dikeve; mîna kaniyeke şeylo û ava sûlaveke têkreçûyî ye.

²⁷ Pir hingivî xwarin ne tiştekî qenc e; û li pey tiştine giran ketin, giraniya canî ye.

²⁸ Mirovê ko bi nefsa xwe ni kare, weke bajarekî vekirî ê bê beden e.