Methelokên 19 - Methelokên Hezretê Silêman 1947

¹ Çêtir e belengazê ko li ser reya xwe a rast diçe, ji yê ko devxwar û dînokek e.

² Tunebûna zanînê ji bona tu kesî ne rind e; û yê ko peyên xwe dilezîne li gunehan dikeve.

³ Dînîtiya mirovekî reya wî şaş dike û pê dilê wî li ber Xwedê asê dibe.

⁴ Dewlemendî zehf hevalan peyda dike, lê ji yekî belengaz heval direvin.

⁵ Şahidê zor bê ceza na mîne; û yê ko derewan dike na filite.

⁶ Xelk pesnê comerdan didin û hemî dostê wî peyayî ne ko diyariyan dide.

⁷ Herwekî bra ji brayê xwe ê belengaz dikerihin, gelo hevalên di wî, jê bi çi qasî dûr diçin; belengaz hêviyan ji wan dike, lê ew li kû ne?

⁸ Yê ko eqilmend bûye ji canê xwe hez dike; û mirovê hişyar bextiyariyê peyda dike.

⁹ Şahidê zor bêceza na mîne û yê ko derewan dike wê perîşan bibe.

¹⁰ Ji bona dîna rojine xweş ne şayeste ne, hêj kêmtir ko xulam axatiya Mîrekan bikin.

¹¹ Eqilmend di ernê de hêdi ne, û di qisûrên xelkê derbaz bûn serfiraziya wan e.

¹² Erna Qiralî weke dengê şêra ye, lê keremkariya wan mîna xunavan li ser serê giyan.

¹³ Kurikekî gêj belayê serê bavê xwe ye, û jinikeke teşxelehebîn mîna dilopên sûlavekê ne.

¹⁴ Ji dê û bav mal û xanî dimînin, lê jinikeke eqilmend diyariya Xwedê ye.

¹⁵ Tiralî mirovan têxe xewnine giran, û canê bêhisab ji birçîna têşe.

¹⁶ Yê ko pendan diparêze, canê xwe diparêze; lê yê ko bala xwe na de reya xwe, wê bimire.

¹⁷ Yê ko arîkariya belengazan dike, deyin daye Xwedê; û Xwedê ji comerdiya xwe lê vêdigerîne.

¹⁸ Heta ko hêvî lê ye, kurê xwe hînî rêz û rêzikan bike; lê li mirina wî me gere.

¹⁹ Ernoyên har xesarê bibînin; tu wî jê xelas bikî jî; ew vedigerîn ve.

²⁰ Pendan bibihîse û hînî zanînê bibe da ko di jiyîna xwe a mayîn de eqilmend bibî.

²¹ Di dilê mirovan de zehf daxwaz hene; lê tiştê ko dilxwaza Xwedê ye, pêk tê.

²² Delalî û hêjabûna mirovan qencdiliya wan e, û belengazek ji derewkerekî çêtir e.

²³ Tirsa Xwedê digihîne jiyînê û pê mirov bi şev têr dibe û xirabî nîzingî lê na ke.

²⁴ Tiral destê xwe li firaxê davêjin, lê na yênin devê xwe.

²⁵ Li qeşmer û tevzekeran xe, pê bodile wê aqil bibin; lewman bike mirovên bijîr, ewê pê qedrê zanînê seh bikin.

²⁶ Yê ko zorê dide bavê xwe û deya xwe der dike kurikekî rûreş û bêbext e.

²⁷ Heke pend û şîret, te ji qeydeyên zanînê dûr têxin, dev ji wan berde.

²⁸ Şahidekî bêhiş henekê xwe bi rastiyê dike, û devê nekesan neheqiyê daqurtînin.

²⁹ Ji bona tevzakeran ceza li ber dest in; û ço ji bona pişta bêhişa ye.