Methelokên 18 - Methelokên Hezretê Silêman 1947

¹ Yê ko terkeserê dinyayê dibe, li daxwaza xwe digere û ji her tiştê bi rê dienire.

² Dînok ji eqilmendiyê hez na ke û tiştên ko di dilê wî de ne dike pêşxelkê bike.

³ Gava mirovekî xerab tê derekê, pîsîtî, bêbextî, kêmanî û şermisarî pev re tên.

⁴ Gotina devê camêran avine kûr in; û ji kaniya eqilmendiyê cobarine boş diherikin.

⁵ Ne rast e ko mirov seba xatirê peyayên xirab û xirayî, heqê bêçare û pakdilan bişkînine.

⁶ Lêvên dînokan rê didin pevçûnê û devê wî nav di lihevxistinekê dide.

⁷ Devê dînokekî xesaran digihîne wî û lêvên di wî bixwe, kemînekê datîne pêşiya di wî.

⁸ Axaftinên peyayên ko paşgotiniya xelkê dikin şîrîn tên guhdaran û dikevin kûrahiya zikên wan.

⁹ Yê ko di xebata xwe de sistiyê dike, brayê wî peyayî ye ko wê xebatê xira dike.

¹⁰ Navê Xwedê asegeheke qaim e; pakdil dikevinê û tê de pal didin.

¹¹ Dewlemendî ji bona xwediyan kelateke asê ye û ew bawer dikin qey bedenên di wê zehf bilind in.

¹² Berî helaketê mirov pozbilind dibe; û mirov beriya ko bigehe serfiraziyê divê barê xem û xebatê hilgire.

¹³ Yê ko beriya ko bibihîse li pirsan vedigerîne, dînîtivekê dike û pê şermisar dibe.

¹⁴ Di nesaxiyê de dilqewînî pişta mirova xurt dike; lê kî dikare yekî dilşikestî ji erdê hilîne.

¹⁵ Dilekî bijîr hînî zanînê dibe û guhê eqilmendan li zanînê ye.

¹⁶ Diyarî reya mirovan fireh dike û wan tîne pêşiya mezinan.

¹⁷ Yê ko ê pêşîn dipeyive xwedîheq xuyanî dibe, lê ko dawadarê din hat; rastî li kû ye eşkere dibe.

¹⁸ Bi pişkan doz û dehwa diqedin û pê di nav mezinan de qerar tête dayîn.

¹⁹ Pevcûna biran zehmet e, ji kelatekê asêtir e û ji qiflên qesran xurttir e.

²⁰ Mirov ji fêkiyên devê xwe zikê xwe tejî dike; û ji hatinên lêvên xwe têr dibe.

²¹ Mirin û jiyîn bi zimên ve girêdayî ne; û yê ko jê hez dikin ji fêkiyên di wî dê bixwin.

²² Yê ko jinikekê peyda dike bextiyariyê peyda dike û digehe rehm û dilovaniya Xwedê.

²³ Feqîr bi nefisbiçûkahiyê devê xwe vedike, dewlemend bi nefsmeziniyê lê vedigerîne.

²⁴ Mana piraniya hevalan perîşanî ye, lê hin hene ji brayekî camêrtir in.