Yozwe 16 - BIBLIYA NTAGATIFU OMU MASHI

Omwanya gwa bene Yozefu

¹ Ecigole canaciyesherwa bene Yozefu. Olubibi lw’ishwa lyâbo lwarhangira olunda lw’e buzûka-zûba oku Yordani aha Yeriko, oku mîshi ga Yeriko; lwanacisôka kurhenga e Yeriko kujà oku ntondo, omw’irungu lya Beteli.

² Lwarhenga aha Beteli-Luzi lwanacigera oku lubibi lwa bene Arki aha Ataroti.

³ Kandi lwanacibungulukira ebwa buzika-zûba, ebwa lubibi lw’Abayefaleti, kuhika oku lubibi lwa Abayefaleti, kuhika oku lubibi lwa Beti­ Horoni oli idako na kuhika aha Gezeri, lwajicîhônda omu nyanja:

⁴ Gwo mwanya bene Yozefu bahîrwe ogwo, Menashè n’Efrayimu.

⁵ Alaga olubibi lwa bene Efrayimu, nk’oku amûko gâbo ganali. Olubibi lw’ecihugo câbo lwàli ntya: ebuzûka-zûba, Ataroti w’Adari, kuhika aha Beti­ Horoni w’enyanya.

⁶ Olwo lubibi lwakazâgihika ebwa buzika-zûba kujà e Mikimetati, lwazonga ebwa Tanati-Silo, lwanacigera embere zâge ebuzûka-zûba bwa Yanowah.

⁷ Kandi kurhenga e Yanowah ha, lwabungulukira e Atoroti n’e Naara, lwahika kuli Yeriko, kandi lwacihonda omu Yordani.

⁸ Kurhenga e Tapuaha, olwo lubibi lwajà olunda lw’ebuzika-zûba, oku mugezi gwa Kana, lwagendicîhonda omu nyanja. Kwo gwàli ntyo omwanya gw’omulala gwa bene Efrayimu nk’oku amûko gâbo ganali.

⁹ Bene Efrayimu bashuhihâbwa ezindi ngo ziberulukine omu cihugo ca bene Menashè, ezo ngo zàli zigwêrhe n’ebishagala byâzo.

¹⁰ Barhalibirhagakwo abanya-Kanâni bayûbakaga e Gezeri. Abanya-Kanâni bayûbakaga ntyo haguma na bene Efrayimu, ci konene nka bashizi ba kukazibakolera.