Yowane 9 - BIBLIYA NTAGATIFU OMU MASHI

Yezu afumya omuhûrha kurhenga okuburhwa

¹ Erhi agera, abona omuntu waburhagwa ali muhûrha.

² Abaganda bâge bamudôsa, mpu: «Waliha Muyigîriza, ndi wajizire ecâha, oyu muntu erhi ababusi bâge, obûla abusirwe muhûrha?»

³ Yezu, erhi: «Oli ye oli ababusi bâge ntà câha bajizire, ci mpu lyo obuhashe bwa Nnâmahanga bubonekana kuli ye.

⁴ Obûla bwacibona, kukwânîne njire emikolo y’owantumaga: obudufu buyiruka, n’obudufu burhakola.

⁵ Obu nciri en’igulu, ndi bumoleke bw’igulu».

⁶ Erhi abà amâderha ntyo, anacitwîra ahanshi, ajira orhujondo n’amarhî gâge, arhushîga oku masù ga gulya muhûrha.

⁷ Okubundi amubwîra, erhi: «Jaga ocîshuke omu iriba lya Silowe» kwo kuderha: orhumirwe. Gulya muhûrha gwagenda, gwacishuka gwanagaluka erhi gukola gwabona n’obwâlagale.

⁸ Abalungu bâge n’abantu bakâg’iyôrha bamubona ajà ahûnahûna, baderha, mpu: «K’arhali olya wakâg’iyôrha ahûnahûna oyu?»

⁹ Baguma, mpu: «Yenêne». Abandi, mpu: «Arhali ye, ci wundi omushushire». Naye, erhi: «Nie nênè».

¹⁰ Bamudôsa, mpu: «Kurhi amasù gâwe gabungûsire?»

¹¹ Abashuza, erhi: «Olya baderha mpu ye Yezu, ye wajiraga orhujondo, arhunshîga oku masù, anambwîra, erhi: “Jaga ocîshuke omu iriba lya Silowe”. “Nayijà, nacîshuka, nanabona”».

¹² Bamudôsa, mpu: «Ngahi ali?» Naye, erhi: «Ntishi».

¹³ Banacîkanyanya olya muntu wali muhûrha emw’Abafarizeyi.

¹⁴ Olusiku Yezu ajiraga orhujondo anamuzibûla amasù lwàli lwa Sabato.

¹⁵ Abafarizeyi nabo bashub’imudôsa kurhi amasù gâge gabungûkaga. Naye, erhi: «Anshîga orhujondo oku masù, nagend’icîshuka, nankola ndwîrhe nabona».

¹⁶ Bafarizeyi baguma, mpu: «Oyo muntu arharhenga emwa Nnâmahanga, bulya arhakenga Sabato». Abandi, mpu: «Kurhi omunya-byâha ankajira ebisômerîne biri nk’ebi?» Bacîgabamwo bônene na bônene.

¹⁷ Banacishub’idôsa olya wali muhûrha, mpu: «Nâwe kurhi odesire kuli oyo wakuzibûlaga amasù?» Naye, erhi: «Ali mulêbi».

¹⁸ Ci Abayahudi barhalonzagya okuyêmêra oku oyo muntu ali muhûrha n’oku akol’adwîrhe abona. Kwo kuhamagala ababusi bâge.

¹⁹ Babadôsa, mpu: «Ka mugala winyu oyu, olya muderha mpu aburhagwa muhûrha? Kurhi akolaga adwîrhe abona?»

²⁰ Ababusi bâge bashuza, mpu: «Rhuyishi oku rhwe rhwamuburhaga n’oku aburhagwa erhi afîre amasù.

²¹ Ci oku akola adwîrhe abona n’owamuzibûlaga amasù, rhurhishi. Mumudôse; akola mulume, yêne acîderhera».

²² Bwôba bwa Buyahudi bwarhumaga ababusi bâge baderha ntyo; bulya bâli erhi bahizire mpu owaderhe oku Yezu ye Kristu anakagwe omu sinagogi.

²³ Co carhumaga ababusi bâge baderha, mpu: «Akola mulume; mumudôse yêne».

²⁴ Abayahudi bashub’imuhamagala obwa kabiri, bamubwîra, mpu: «Okuze Nnâmahanga! Rhwêhe rhuyishi oku ola muntu ali munyabyâha».

²⁵ Naye, erhi: «Akabà ali munya-byâha, ntishi; kantu kaguma kône mmanyire: nali muhûrha na buno nkola ndwîrhe nabona».

²⁶ Banacimudôsa, mpu: «Kurhi kulya akujizire? Kurhi akuzibwîre amasù?»

²⁷ Abashuza, erhi: «Nammubwîzire mîra, murhanayumvîrhe­. Carhuma mwalonza nshub’immubwîra? Nkaba ninyu mwalonza okubà baganda bâge?»

²⁸ Banacirhondêra bamujâcira, mpu: «Okaba muganda wâge! Rhwêhe rhuli baganda ba Mûsa.

²⁹ Rhwêhe rhuyishi oku Mûsa ye Nnâmahanga abwîzire ebinwa byâge; ci oyo rhurhishi ali wa ngahi?»

³⁰ Olya mulume abashuza, erhi: «Lêro namasômerwa! Murhishi ali wa ngahi omuntu onfumize obuhûrha!

³¹ Rhuyishi oku Nyamuzinda arhayumvîrhiza banya­-byâha, ci omuntu omurhumikira n’ojira oku alonza ye ayumvîrhiza.

³² Ka mukola muyumvîrhe omuntu azibwîre amasù gw’owaburhagwa muhûrha?

³³ Acibâga arhali emwa Nnâmahanga arhenga, ntâco anankajizire».

³⁴ Bamushuza, mpu: «Kurhenga omu nda ya nyoko erhi oyunjwîre byâha, onakola mpu warhuyigîriza!». Banacimulibirhakwo.

³⁵ Yezu ayumva oku bamulibisirekwo. Erhi bacishimânana, amubwîra, erhi: «K’oyêmîre Mwene-omuntu?»

³⁶ Naye, erhi: «Ye ndi, Nyakasane, mmuyêmêre?»

³⁷ Yezu amubwîra, erhi: «Omubwîne, ye dwîrhe akudesa».

³⁸ Naye, erhi: «Nyêmîre, Nyakasane!» Anacifukama embere zâge.

³⁹ Okuhandi Yezu anaciderha, erhi: «Kucîranula kwandwîrhe en’igulu: lyo abarhabona babona, n’ababona babè mihûrha».

⁴⁰ Abafarizeyi bahali erhi bayumva, bamudôsa, mpu: «Ka rhuligi mihûrha nîrhu?»

⁴¹ Yezu ababwîra, erhi: «Mucibaga mihûrha, rhinga ntà câha mugwêrhe. Ci mwêhe, mpu: Kubona rhubona! Co ci­rhumire ecâha cinyu ho cinaciri».