Yowane 2 - BIBLIYA NTAGATIFU OMU MASHI

Obuhya e Kana

¹ Olusiku lwa kasharhu, habà obuhya e Kana omu Galileya. Nnina wa Yezu erhi yo ali.

² Naye Yezu àli mulâlike kw’obwo buhya bo n’abaganda bâge.

³ Lêro idivayi lyanacibula, bulya idivayi ly’obuhya lyàli erhi lyamâhwa. Nnina wa Yezu anacimubwîra, erhi: «Barhacigwerh’idivayi».

⁴ Naye Yezu amushuza, erhi: «Nyoko we, k’okwo kurhuyêrekîre? Amango gâni garhacihika».

⁵ Nnina aj’ibwîra abarhumisi, erhi: «Ngasi oku akammubwîra, mukujire».

⁶ Hàli rhubindi ndarhu rhwa mabuye, rhw’okuhiramwo amîshi Abayahudi bakalaba, ngasi kaguma ka ngero ibiri erhi isharhu.

⁷ Yezu ababwîra, erhi: «Yunjuzi orhu rhubindi mîshi». Barhumbumba kuhika oku muhiro.

⁸ Ashub’ibabwîra, erhi: «Domagi, muhekere omushongwe». Banacimuhêkera.

⁹ Erhi omushongwe alabulakwo galya mîshi gahindusire divayi, arhànali amanyire aha eryo divayi lyarhengaga, ci abarhumisi bàl’idôma amîshi erhi bamanyire bwinjà, ahamagala omuhya mulume,

¹⁰ amubwîra, erhi: «Kali abandi idivayi linjà barhang’ihâna, n’erhi abantu bakolabalimwo orukara, lyo barhanza elirhali linjà. Ci wêhe wal’irhanzir’ibîka idivayi linjà kuhika buno!»

¹¹ Co cisômerîne cirhanzi ca Yezu eco. Acijiraga e Kana omu Galileya. Ayêrekana irenge lyâge, n’abaganda bâge bamuyêmêra.

¹² Okubundi anaciyandagalira e Kafarnaumu bo na nnina, na bene wâbo, n’abaganda bâge. Ajirayo nsiku nsungunu.

Yezu ahulusa abakâg’iguliza omu ka-Nyamuzinda

¹³ Basâka w’Abayahudi erhi àbà hôfi, Yezu ayinamukira e Yeruzalemu.

¹⁴ Abugâna abarhunzi omu ka-Nyamuzinda bakâg’irhimbûla enkafu, ebibuzi n’engûkù, n’abandi badahîre erhi badwîrhe bakâba.

¹⁵ Ayanka omugozi, ahunga omunyuli, abahulusa boshi omu ka-Nyamuzinda bo n’ebibuzi n’enkafu zâbo; ashandâza ensaranga z’abakâg’ikâba n’oburhalulè bwâbo abukunungula.

¹⁶ Anacibwîra abarhunzi b’engûkù, erhi: «Rhenzi ebi. Enyumpa ya Larha murhayihindulaga cibuye».

¹⁷ Abaganda bâge bakengêra eci cinwa c’Amandiko: «Obushiru bw’enyumpa yâwe bwayish’indya».

¹⁸ Obwo Abayahudi banacijaho, bamubwîra, mpu: «Cimanyîso cici orhuyêresiremwo obuhashe bw’okujira ntya?»

¹⁹ Naye Yezu abashuza, erhi: «Shabûli aka ka-Nyamuzinda; nashub’ikayimanza omu nsiku isharhu».

²⁰ Abayahudi bamubwîra, mpu: «Aka ka-Nyamuzinda kayûbasirwe myâka makumi anni na ndarhu, nâwe mpu wâshub’ikayimanza omu nsiku isharhu?»

²¹ Ci yêhe ka-Nyamuzinda k’omubiri gwâge aderhaga.

²² Erhi abà amâfûka omu bafù lyo abaganda bâge bakengîre ako kanwa; bayêmêra Amandiko n’akanwa Yezu aderhaga.

Yezu omu Yeruzalemu

²³ Amango ali e Yeruzalemu oku lusiku lukulu lwa Basâka, bantu banji bayêmêra oku izîno lyâge, erhi bamâbona ebisômerîne akâg’ijira.

²⁴ Ci Yezu yêhe arhacîkubagiragabo, bulya àli abamanyire boshi,

²⁵ arhanali alagîrîre oku­bwîrwa na ndi: àli amanyire akali aha murhima gwa ngasi muntu.