Migani 1 - BIBLIYA NTAGATIFU OMU MASHI

Izîno ly’ecitabu

¹ Migani ya Salomoni, mwene Daudi, mwâmi w’Israheli:

² oku kumanya oburhimanya n’ihano, oku kuyumva bwinjà ebinwa bizibu;

³ oku kumanya abîgîrizibwa n’abalenga, okushinganyanya, okubà ntagengwa n’okurhondêza;

⁴ okuhêreza abagûnda obulenga, n’omwâna w’obusole obumanye n’obulenga bw’amakengu.

⁵ Omurhimanya ayumve, anayûshûlemwo obulenga bwâge, n’omuntu mukengwa akûlemwo obulenga bw’okurhegeka;

⁶ amanyiyumva ebinwa bizibu n’emigani, ebinwa by’abarhimanya n’emigani yâbo.

⁷ Okurhînya Nyamuzinda, gwo murhondêro gw’oburhimanya, basirhe bwo barhakwirirwa burhimanya, barhakwirirwa n’ihano.

I. Enshula-mwanzi: Amahano gw'oburhimanya Omurhimanya kuyâka ayâka abîra babî

⁸ Yumva mwâna wâni, ihano lya sho, orhahîraga okagaya akanwa nyoko akubwîra,

⁹ ciri cimanè ca kukwânana irhwe lyâwe, gali magerha omu igosi lyâwe.

¹⁰ Mwâna wâni, erhi abanya-byâha bakâlonza okukushumika, orhayêmêraga!

¹¹ Erhi bakakubwîra mpu: «oyîshe rhugende rhweshi, rhucîbundike rhubulage omukò buzira igwârhiro, rhucîfulike rhulinge omwêru-kwêru:

¹² mpu rhubamiranguse kula okuzimu kunajira, rhubamire baguma-guma nka kula banayandagalira omu nshinda.

¹³ Mpu rhwabona ebinja-binji, enyumpa zîrhu rhwazibûmba munyago,

¹⁴ Mpu wayesha ecigole haguma nîrhu obone ogwâwe mwanya, nshoho nguma rhwakazibîkira rhweshi».

¹⁵ Mwâna wâni, orhahîra okabakulikira omu njira bali, oyêrekeze amagulu gâwe kuli n’enjira balimwo,

¹⁶ bulyâla amagulu gâbo buhanya gayêrekîre, galibirhîre okugendibulaga omukò,

¹⁷ na bulyâla kuli kurhamira busha, okulambûlira akasirha omu masù g’akanyunyi.

¹⁸ Abôla bônene bacîrhega, buhanya bwâbo bayunja-yunja.

¹⁹ Kwo azinda ali ntyo oli magene gw’okuzimba, amagene kuyisa gayisa oyu gamahândira.

Okuyumva amahano g’oburhimanya

²⁰ Oburhimanya budwîrhe bwayâkûliza omu njira, bulengezize izù omu ngo ziri emuhânda.

²¹ Aha mashanga-njira kuhamagala budwîrhe bwahamagala, aha nyumvi z’olugô, bugwêrhe emyanzi.

²² Mpu «mmangaci mwaleka obuhwinja bwinyu ebi bingolo-ngolo? Na ba-cinya-masheka kuhika mangaci erhi bâsheka? N’abahwinja, kuhika mangaci erhi bayânga obumanye?

²³ Muyêrekere amahano gâni, nkola nâmmubwîra ogûndi emurhima, nâmmumanyisa ebinwa ngwêrhe.

²⁴ Kulya kubà nahamagîre, kulya kubà nalengezize okuboko na ntâye washibirîre,

²⁵ Kulya kubà mwagayaguzize amahano gâni goshi, murhanayemiri mmubwîre,

²⁶ Nâni nkola nashekera obuhanya bumulikwo, nâsheka hano mujâmwo ecikango.

²⁷ Hano entemu emurhibukira nka nkuba ya cihonzi, hano obuhanya bwinyu buyisha nka mpûsi ya kalemêra, amango ebidârhi, n’ebihamba byâmurhibukira.

²⁸ Ago mango bâmpamagala ci ntadumizè, bânnonza barhânambonè.

²⁹ Balahire obumanye, babula kwacîshoga okurhînya Nyakasane.

³⁰ Barhalonzagya ihano lyâni, bàgayire ebi nababwîraga byoshi:

³¹ Bakolaga bâlya amalehe gw’obuhabusi bwâbo, bàyigurha amahano bàcîhaga bône.

³² Bulya obuhûrha bw’omuhwinja bunamuyîrhe, n’oburhashîbirira bw’ebingolo-ngolo bunabihezè.

³³ Ci kwône onyumva yêhe âyôrha adekerîre, anarhulûle buzira kuyôboha buhanya buci».