Mibalè 24 - BIBLIYA NTAGATIFU OMU MASHI

Balâmu ashubigisha Israheli

¹ Balâmu abona oku Nyamubâho arhonyize okugisha Israheli, lêro arhacijaga nk’agandi mango ebwa kugendidôsa embuko, ci ayêrekeza obusù bwâge ebwa irungu.

² Erhi Balâmu abà amâyinamula amasù, abona oku bene Israheli bahanzire ishanja oku lindi, anaciyagânwa na Mûka gwa Nyamuzinda,

³ aderha ecinwa câge, erhi: Obugeremwa bwa Balâmu mwene Beori, Obugeremwa bwa omuntu onizire isù,

⁴ Obugeramwa bwa olya muntu oyumva ebinwa bya Nyamuzinda, Kubona abona ebi Ogala-byoshi ayêrekana, anahâbwe n’ishuzo limâna n’amasù gâge gabungûke.

⁵ Alà oku gayinjiha amahêma gâwe Yakôbo! n’enyumpa zâwe, Israheli!

⁶ Nka kula orhubanda rhulanduka, nka kula amashwa mahinge oku lwîshi, nka binûsi Nyamubâho arhwêraga, nka kula emiyerezi elandira oku burhambi bw’amîshi.

⁷ Amîshi ganasheshe ebi bindi byâge, n’emburho yâge egundumuke enyanya ly’ago mîshi manji, omwâmi wâge ayisha ayêrêra enyanya ly’Agagi, n’obwâmi bwâge bwajire irenge!

⁸ Nyamuzinda amurhenza e Mîsiri: amuhà emisî eri nka ya mbogo. Yamalîra amashanja gashingalala embere zâge. Yabavunangula orhuvuha, anabatyabule n’emyampi yâge.

⁹ Anagonye amadwî, acîbundike nka ntale ndume, nk’amacîbundika nka nsimba, ndi wankacimuzûsa? Agishwe, owâkugishe n’owakuhinde, akahindwa!

¹⁰ Oburhè bwa Balaka bwayâka bwenêne kuli Balâmu, ashûrha omu nfune, amubwîra erhi: «Nalikuhamagala nti ohehêrere abashombanyi bâni, wêhe kwamabà kubagisha kasharhu.

¹¹ Na buno yimukaga duba olibirhire emwâwe! Nali ndesire nti nakujira oj’irenge; lêro lolà oku Nyamubâho amakuyegûla kuli lyo.»

¹² Balâmu anacishuza Balaka erhi: «Ka ntali erhi nabwîzire entumwa wali orhumire, oku:

¹³ Ciru Balaka akampa enyumpa yâge eyunjwîre nfaranga na masholo, ntakavuna irhegeko lya Nyamubâho, omu kujira niene nk’oku nnonzize okujira ehinja erhi ehibî; n’oku ngasi oku Nyamubâho anadesire kwo naderha?

¹⁴ Alaga oku bunôla nkola nacîshubirira emw’olubaga lwâni; yishaga nkubwîre ehi olu lubaga lwanajirîre olubaga lwâwe omu nsiku zàyisha».

¹⁵ Okuhandi anaciderha ebi binwa, erhi: Bugeramwa bwa Balâmu mwene Beori, bugeramwa bw’omuntu wanizire isù,

¹⁶ bugeramwa bw’olya muntu oyumva ebinwa bya Nyamuzinda ye oyishi eby’Ow’Enyanya ye olya obona ebyanacibonwe by’Ogala-byoshi olya okûmba bûbi anagalirhondêra abona.

¹⁷ Namamubona, ci kwône arhacibà wa buno; namamulâba ci kwône arhacibà nk’oli hôfi. Enyenyêzi yamârhenga muli Yakôbo, akarhi k’obwâmi kamayimanga omu Israheli; kamavunanga emyanganga ya Mowabu, Kamamalîra bene Seti.

¹⁸ Ecihugo c’Edomu camagwârhwa busâsa, na Seyiri kwo n’okwo; Israheli amâlambûla obuhashe bwâge.

¹⁹ Emwa Yakôbo yamârhenga omurhegesi ye wamalîra ngasi bicisigîre omu ngo na Edomu.

²⁰ Balâmu abona Amaleki, anacimubwîra ebi binwa, erhi: «Amaleki lyo ishanja likulu omu mashanja, n’obuzinda bwâge kwabà kushâbûka».

²¹ Balâmu anacibona bene Keneti, anaciderha, erhi: Aha mwinyu bahazibuhize, ewe Kayini, n’enyumpa zinyu ziri nyûbake oku ibuye.

²² Ci kwônene olugo lwinyu lubà lwa Beori; amango gahi mwanarhenge omu bujà bwa Asûru?

²³ Balâmu ashubirira aderha ebi binwa, erhi: Aye, amashanja g’emashinji gabugânana emwênè,

²⁴ n’enkugè olunda lw’e Kitimi. Gamalibûsa Asûru, gamabengeza Eberi; naye obuzinda bwâge kuli kuherêrekera lwoshi.

²⁵ Balâmu erhi abà amayimuka, ahuma njira, acîshubirira emwâge; naye Balaka ajà lwâge lunda.