Mateyo 17 - BIBLIYA NTAGATIFU OMU MASHI

Yezu ahinduka obusù

¹ Erhi kugera nsiku ndarhu, Yezu arhôla Petro na Yakôbo bo n’omulumuna Yowane, anacibahêka bône bône oku ntondo ndîrî.

² anacihindukira obusù embere zâbo: obusù bwâge bwalangashana nk’izûba n’emyambalo yâge yanacibà nka myonzi y’izûba.

³ Aho Mûsa na Eliya banacibabonekera, bakaz’ishambâla bo naye.

⁴ Naye Petro arhondêr’aderha, abwîra Yezu, erhi: «Yâgirwa, kuli kwinjà rhubêre hano: okalonza, nayûbakaho rhuyumpa rhusharhu, higuma hyâwe, ehindi hya Mûsa, n’ehindi hya Eliya».

⁵ Oku anacidwîrhe aderha, olwikungu lwêru lwababwîka; izù lyanacirhengamwo lulya lwikungu, lyaderha, erhi: «Oyu ye Mugala wâni muzigirwa, oyu nsîma bwenêne, mukaz’imuyumva».

⁶ Erhi abalâlîzi bâge bayumva lirya izù, bakulumba bûbi, obwôba bwabagwârha.

⁷ Obwo Yezu bajaho, abahumakwo anababwîra, erhi: «Yimuki, murhayôbohaga».

⁸ Erhi baciyinamula amasù, barhacibonaga ndi, orhali Yezu yênene.

⁹ Erhi bacibà badwîrhe bayandagala oku ntondo, Yezu abakomêreza, anababwîra, erhi: «Murhabwîraga ndi ebi mwabwîne, kuhika Mwene-omuntu afûke omu bafù».

Amango Eliya anagaluke

¹⁰ Lêro abaganda bâge banacîdôsa, baderha, mpu: «Cirhuma abashamuka b’ihano bakaz’iderha mpu Eliya akwânîne ayishe?»

¹¹ Naye erhi abashuza, abà­bwîra, erhi: «Nêci, Eliya ayish’iyisha, anayish’ikombêza byoshi.

¹² Ci mmubwîzire oku Eliya ayishire mîra, barhanamumanyaga, ci bamujira oku balonzagya. Mwene-omuntu naye ntyo kwo ayish’ibabazibwa nabo».

¹³ Obwo abaganda bâge bayumva oku Yowane Mubatiza alonzagy’iderha.

Yezu alibirhakwo shetani w’oluhungu-isirhe

¹⁴ Erhi bacihika aha bantu, muntu muguma amujaho, amuharâmya anamu­bwîra, erhi:

¹⁵ «Nyamwagirwa, obêre mugala wâni obwonjo, asirahire anababîre bwenêne: kanji kanji anakazicîloha ecîko n’omu mîshi.

¹⁶ Namuhîre abaganda bâwe, ci barhahashag’imufumya».

¹⁷ Yezu erhi amushuza, amubwîra, erhi: «Eri iburha libula-buyêmêre na linya-mabî, kuhika mangaci nayôrha ninyu? Kuhika mangaci nammulembera? Nderheragiye hano».

¹⁸ Yezu anacimukankamira, n’olya shetani amurhegamwo, n’omwâna anacifuma ho na halya.

¹⁹ Obwo entumwa zanacimujaho bufunda-funda, zadôsa Yezu, mpu: «Carhumire rhwêki rhurhahash’imuhulusa bulya?»

²⁰ Yezu anacibabwîra, erhi: «Kubula bwêmêre kwinyu kwarhumire. “Mmubwîre okuli, nka mugwêrhe obwêmêre buli nka mogomogo ya sinapi”, “mwanabwîra eyi ntondo, erhi”: “Rheng’aha”, “ojè hala”; “enagende, na ntâco cankammuyabira”». [

²¹ Shetani wa bênè oyu arhahulusibwa n’ezirhali nsengero n’okucîshalisa.]

Yezu abwîra abaganda bâge obwa kabiri oku ayish’ibabala

²² Erhi bacibà bali boshi haguma omu Galileya, Yezu anacibabwîra, erhi: «Mwene-omuntu ayish’ihânwa omu maboko g’abantu.

²³ Bayish’imuyîrha, n’o­lusiku lwa kasharhu ayish’ifûka». Obwo abaganda bâge banacibà burhè bwenêne.

Yezu bo na Petro bahâna entûlo y’aka-Nyamuzinda

²⁴ Erhi bacihika e Kafarnaumu, abakâg’ihôza entûlo y’aka-Nyamuzinda bajaho Petro, banamubwîra, mpu: «Ka Nnâhamwinyu yêhe arhahàna ntûlo y’aka-Nyamuzinda?»

²⁵ Anacishuza, erhi: «Nêci». Lêro erhi bacija omu nyumpa, Yezu ayirukir’amubwîra, erhi: «Kurhi okengîre, Simoni? Abâmi b’igulu, bahi bavurhîsa? Ka bambali bâbo erhi bagenyi?»

²⁶ Erhi naye acimushuza, erhi: «Bagenyi», Yezu amubwîra, erhi: «Kuziga abambali barharhegesirwi.

²⁷ Ci kwônene, lyo rhurhabasârhaza, ojè emashinji, ogend’iloba, n’enfî ntanzi wakagwâsa, oyilole ekanwa: washimânamwo ensaranga; oziyanke, obahêzo kuli nie nâwe».