Mafulûlo 7 - BIBLIYA NTAGATIFU OMU MASHI

Abalikwo ecimanyîso c’Omwâna-buzi barhâbè kurhi

¹ Enyuma ly’okwo, nabona bamalahika bâni bayimanzire oku marhwêrhwè anni g’igulu, erhi bashwêsire empûsi z’igulu oku zinali ini, mpu zakanahûkiza oku cihugo, nîsi erhi oku nyanja, nîsi erhi oku murhi.

² Okuhandi nanacibona owundi malahika wayinamukaga arhenga ebushoshôkero bw’izûba, erhi afumbasire ecimanyîso ca Nyamuzinda ozîne. Ayâkûza n’izù linene balya bamalahika bani bâli bahâbirwe obuhashe bw’okuherêrekeza igulu n’enyanja, erhi:

³ «Mumanye mwankaherêrekeza igulu, nîsi erhi enyanja, erhi emirhi, kuhika rhuhebe bambali ba Nyamuzinda wîrhu ecimanyîso emalanga».

⁴ Nayumva ba­nga bahebirwekwo ecimanyîso: bihumbi igana na makumi anni na bini b’omu mûko goshi ga bene-Israheli.

⁵ Omu bûko bwa Yûda, bihumbi ikumi na bibiri byahebwakwo ecimanyîso; omu bûko bwa Rubeni, bihumbi ikumi na bibiri; omu bûko bwa Gadi, bihumbi ikumi na bibiri,

⁶ omu bûko bw’Azeri, bihumbi ikumi na bibiri; omu bûko bwa Nefutali, bihumbi ikumi na bibiri; omu bûko bwa Manasè, bihumbi ikumi na bibiri;

⁷ omu bûko bwa Simoni, bihumbi ikumi na bibiri; omu bûko bwa Levi, bihumbi ikumi na bibiri; omu bûko bwa Isakari, bihumbi ikumi na bibiri;

⁸ omu bûko bwa Zabuloni, bihumbi ikumi na bibiri; omu bûko bwa Yozefu, bihumbi ikumi na bibiri; omu bûko bwa Benyamini, bihumbi ikumi na bibiri byahebwakwo ecimanyîso.

Abîshogwa ba Nyamuzinda bagandâza omu bwâmi bw’empingu

⁹ Enyuma ly’okwo, nabona ehitù hy’abantu barhankaganjwa: bâli ba ngasi cihugo, ba ngasi bûko, na ngasi ishanja, na ba ngasi lulimi luderhwa. Erhi bayimanzire embere ly’entebe y’Omwâna-buzi, banayambîrhe emyambalo myêru, banafumbasire amashami g’emishugushugu omu nfune.

¹⁰ Bakâyakûza n’izù linene, mpu: «Ayâgirwe Nnawîrhu Nyamuzinda otamîre oku ntebe bo n’Omwâna-buzi!».

¹¹ Na bamalahika erhi bazungulusire entebe n’Abagula na zirya Nsimba oku ziri ini; banacikwêba oku idaho embere ly’entebe, baharâmya Nyamuzinda, mpu:

¹² Nêci mushâna, Nnawîrhu Nyamuzinda ayâgirwe, aj’irenge, arhimanya, avugwe omunkwa, akuzibwe, aluze obuhashe n’emisî omu myâka n’emyâka! Amen!

¹³ Muguma muli balya Bagula anacijaho, a­mbwîra, erhi: «Abà bayambîrhe emyambalo myêru bo bahi, na ngahi barhenga?»

¹⁴ Nâni, nti: «Waliha, wêne omanyire». Anacimbwîra, erhi: «Abo bo ba­lya bazind’irhenga omu malibuko madârhi; bàshusire emyambalo yâbo ba­nayiyêruhiza omu mukò gw’Omwâna-buzi.

¹⁵ Co cirhumire bali aha mbêre z’e­ntebe ya Nyamuzinda, co cinarhumire bamukolera mûshi na budufu omu luhêro lwâge; n’otamîre oku ntebe akola ayish’iyûbaka ecihando câge ekarhî kâbo.

¹⁶ Barhakacishalika barhakanaciyumva nyôrha bundi; ntà mango izûba lyacibalibuze, na ntà hidûrhu hyacibajire kurhi.

¹⁷ Bulya Omwâna-buzi, oyîmanzire aha karhî k’entebe, yêne abà lungere wâbo, anabalangûle enjira ehêka ebw’iriba ly’amîshi g’obuzîne, Na Nyamuzinda abahôrhola emirenge yoshi ebali oku masù».