Lwimbo 1 - BIBLIYA NTAGATIFU OMU MASHI

Izîno ly’ecitabu n’enshula-mwanzi

¹ Olwimbo lw’Enyimbo. Lwa Salomoni.

Omuhya

² Ayishe anûnugurhe n’ehinûnugurho hy’akanwa kâge. Okusîmwa nâwe kwo kununu ah’idivayi.

³ Amavurha ocîshizire alà nka gahumula bwinjà! izîno lyâwe ciru lyône, mavurha gadubuka, co cirhuma abanyere bakusîma.

⁴ «Onkeme nkushimbe, rhukanye! Mwâmi ampesire omu mwâge; We wâbà busîme na bushagaluke bwîrhu. Okusîmwa nâwe kwarhulalusa kulusha idivayi; Bayazize abakusîma».

Ecîtakîro cirhanzi Omuhya

⁵ Ndi mwîru ci ndi mwinjà, wâni mwe banyere b’e Yeruzalemu, kwo ndi aka amahêma g’e Kedari, aka ebihando by’e Shalma.

⁶ Murhalolaga omubiri gwâni mwîru, izûba eryo lyambabaga? Bagala ba nyâmà abâla bandubiraga, banjira mulanzi wa mizâbîbu. Elyani ishwa ly’emizâbîbu ntalilangaga!

⁷ Mbwîraga mâshi Muzigirwa w’omurhima gwâni: ngahi wayâbulira obusò? Ngahi waziyahula hano zirhenga omu izîko? Lyo ntagija nageragera nka cirala emunda amasò g’abinyu gayabukire.

Abimbiza

⁸ Akabà orhamanyiri wâni namwinja w’abakazi boshi, okulikire enshando z’obusò onayabulire abâna-hene bâwe entambi z’ebwa bigala by’abangere.

Omuhya-mulume

⁹ Wâni Musimwa wâni, namâkushushanya na kahesi wâni bashwekire oku ngâlè ya Faraoni mwâmi w’e Mîsiri!

¹⁰ Amarhama gâwe nka gayinjiha aha karhî k’ebisikiyo, alà ehigosi ogwêrhe omu karhî k’amagerha.

¹¹ Bisikiyo bya masholo rhwakulongeza n’olugole lw’amarhale.

Bône na nnene: omuhya n’omuhya-mulume

¹² Oku nnakuno ali omu côgo câge, n’obukù bwâni bwayuduka.

¹³ Omuzigirwa wâni hiri hirhù hya bukù, hidekerire aha karhî k’amabêre gombi.

¹⁴ Omuzigirwa ali cihadu ca mukû omu ishwa ly’emizâbîbu y’e En-Gadi.

¹⁵ -Alà nka wayinjiha, Muzigirwa wâni, alà nka wayinjiha! Amasù gâwe ziri ngûkù

¹⁶ -Nka wayinjiha Muzigirwa wâni, nka wanuna wâni! Encingo yîrhu ishamba.

¹⁷ -Emitungo y’enyumpa yîrhu eri ya nduluma n’oburhungiri buli bwa nsindani.