Izaya 20 - BIBLIYA NTAGATIFU OMU MASHI

Mîsiri ahimwa n’Asîriya

¹ Omwâka omukulu w’abasirika ahikaga aha Ashidodi arhumirwe na Saragoni, mwâmi w’e Asîriya, anacigorha olwo lugo analugwârha.

² Mw’ago mango, Nyakasane anacîderhera omu kanwa ka Yeshayahu, mwene Amotsi, erhi: «Genda, ofundûle oyo sunzu okuli ecibunu, ohogole n’enkwêrho zikuli emagulu.» Anacikujira: akàj’agenda bushugunu na buzira nkwêrho.

³ Okuhandi Nyakasane anaciderha, erhi: «Nka kulyâla omurhumisi wâni Yeshayahu ajag’agenda bushugunu na buzira nkwêrho myâka isharhu, mpu abè cimanyîso na bulêbi kuli Mîsiri na Kushi,

⁴ “ntyo kw’omwâmi w’e Asîriya âyîsh’ihêka ebigorogo by’e Mîsiri n’empira z’e Kushi, emisole n’abashosi, bushugunu, buzira nkwêrho n’amahiji mabwîkûle: zibè nshonyi za Mîsiri!”

⁵ “Bazânwa n’e­ nshonyi zibabumbe erhi Kushi bakazâg’icîkubagira orhuma na Mîsiri wakazâg’ibalimbîsa”.

⁶ “Olwo lusiku, abantu babà luno lunda lw’emashinji bânâderhe, mpu: Alaga oku bàbîre balyâla rhwakâg’icîkubagira, balyâla rhwakâg’ilonza okuyâkira emwâbo nti barhurhabâle banarhulîkûze oku mwâmi w’e Asîriya! Lêro ngahi rhwacig’ilongeza obucire?”»