Haggeyo 1 - BIBLIYA NTAGATIFU OMU MASHI

Amango g’okushub’iyûbaka akà-Nyamuzinda

¹ Omu mwâka gwa kabirhi gw’obwâmi bwa Dariusi, mwêzi gwa ndarhu, omu lusiku lurhanzi lwâgwo, akanwa ka Nyamuzinda kahêkwa n’omulêbi Hageyo emwa Zorobabeli mwene Shalatieli, murhambo w’e Yûda, n’emwa Yozwè, mwene Yehosadaka, mudâhwa mukulu, kaderha ntya:

² Nyamuzinda w’Emirhwe amâderha ntya: Olu lubaga ludwîrhe lwaderha, mpu: «Garhacibà mango g’okuyûbakulula akà-Nyamuzinda!»

³ Lêro akanwa ka Nyamuzinda kalêrhwa ntya n’omulêbi:

⁴ Ka munabwîne oku kuli kwinjà mubêre omu nyumpa nyinjinjà n’obwo akà-Nyamuzinda kâni kashâbûsire?

⁵ Lêro buno, kanwa ka Nyamuzinda w’Emirhwe. Mucijâge emurhima mulolêreze enjira zinyu!

⁶ Mwarhêzire binji, ci mwahaka binyi omu nguli zinyu; mwalîre birhali binyi, ci murhayigurhaga; mwanywa, ci enyôrha yinyu erhatwikaga; mwayambaliza, ci nt’idûrhu mwayumvîrhe. Omukozi àhâbwa oluhembo lwâge, ci lwâbà nka kuno luja omu nshoho ntule!

⁷ Kanwa ka Nyamuzinda w’Emirhwe. Mugerêreze bwinjà emurhima gwinyu, mulole enjira mulimwo.

⁸ Yinamukiri oku ntondo, mujidurhira ebirhi, muyûbake enyumpa yâni. Nâhiramwo amasîma gâni, n’irenge lyâni ligandâzemwo, Nyamuzinda okudesire.

⁹ Mwakâg’ilangâlira okusârûla binji, ci lêro mwanenwa. Ebi mwahasire, nâbiyehûla n’empûsi. Bulya kurhi? Kanwa ka Nyamuzinda w’Emirhwe. Bulya enyumpa yâni eshâbûsire, n’obwo ngasi muguma muli mwe adwîrhe agwîririza okuyûbaka aha mwâge.

¹⁰ Okwo kwarhuma e­nkuba ehangama, n’idaho lyânena emburho.

¹¹ Nâlêrha ecanda omu cihugo; oku ntondo, omu mashwa g’engano, oku lukoma lw’emizâbîbu, omu mashwa g’emizêti n’ezindi mburho; abantu n’ebintu byoshi byâlibuka, na ngasi mukolo gwinyu gwoshi gwafânânda.

¹² Oku bundi obwo, Zorobabeli, mwene Shalatieli, na Yozwè, mwene Yehosadaka, mudâhwa mukulu, n’olubaga lwoshi, bayumvîrhiza akanwa ka Nyamuzinda n’akanwa k’omulêbi Hageyo, nk’oku Nyamubâho, Nyamuzinda wâbo àlirhumire oyo mulêbi. Aho, olubaga lwayôboha Nyamuzinda.

¹³ Kandi Hageyo, ntumwa ya Nyakasane, abwîra olubaga ntya akanwa ka Nyakasane: «Ndi haguma ninyu, kanwa ka Nyamuzinda».

¹⁴ Nyakasane ayunjuza makengu Zorobabeli mwene Shalatieli, murhambo w’e Yûda na Yozwè mwene Yehosadaka, mudâhwa mukulu, n’olubaga lwoshi: bayisha banarhondêra okukola omu ka-Nyamuzinda, Nyakasane w’Emirhwe.

¹⁵ Ago mango zàli nsiku makumi abirhi n’ini z’omwêzi gwa ndarhu, mwâka gwa kabirhi gw’obwâmi bwa Dariyusi.