Filemoni 1 - BIBLIYA NTAGATIFU OMU MASHI

Omusingo

¹ Paolo, mubohe wa Kristu Yezu, na mwene wîrhu Timoteyo, kuli Filemoni, murhabâzi wîrhu muzigirwa,

² na mwâli wîrhu Afiya, n’owîrhu rhulwa entambala rhweshi naye, Arkipo, haguma n’endêko y’abemêzi babugânana aha mwâwe:

³ enshôkano n’obuholo bimmugabirwe na Larha Nyamuzinda na Nyakasane Yezu Kristu!

Paolo avuga omunkwa

⁴ Ntahusa kuvuga Nyamuzinda wâni omunkwa nka nakukengêra omu nsengero zâni,

⁵ bulya nankâyumva baderha obuzigire n’obuyêmêre bwâwe kuli Nyakasane Yezu n’oku batagatîfu boshi.

⁶ Owabona ecinyabuguma c’obuyêmêre bwâwe ciyôrha cikanyire cinakurhabâle okumanya aminjà goshi rhwankahash’ijira erhi Kristu orhuma!

⁷ Nêci okuli, mwene wîrhu, nsîmire bwenêne nanayumva oburhûlirize erhi buzigire bwâwe burhuma, bulya warhulirîze emirhima y’abatagatîfu.

Paolo alagira Onezimo

⁸ Co cirhumire, ciru akabà ngwêrhe obuhashe muli Kristu bw’okukurhegeka ebi okwânîne okujira,

⁹ nnonzize nkuyinginge erhi kwo erhi buzigire burhuma. Nie Paolo, olya mushosi Paolo, oli buno mubohe wa Kristu Yezu!

¹⁰ Nsengerîre mugala wâni naburhiraga omu mpamikwa, oyûla Onezimo.

¹¹ Mîra ntâco akukwânîne, ci lêro bunôla akola âkukwânana bwenêne, ana­nkwânine nâni.

¹² Y’oyo nkurhumîre; ye murhima gwâni.

¹³ Nankasîmire mmuyôrhane, nti antabâle ahâli hâwe muno nkoba ndimwo erhi Myanzi y’Akalembe erhuma;

¹⁴ ci naderha nti ntankajira akantu ntanakudôsizi, nti lyo orhasêzibwa okujira ecinjà, ci ocikole oku bulonza bwâwe.

¹⁵ Nkaba Onezimo arhanzir’ikubunga mango masungunu mpu muyish’ibêra naye ensiku n’amango,

¹⁶ ci arhaciri nka mujà wâwe, ci kulusha omujà: nka mwene winyu muzigirwa. Ali ye lwoshi lwoshi kuli nie; kanga kulusha abà ye kuli we oku mubiri na muli Nyakasane!

¹⁷ Lêro akabà oyêmîre oku rhuyinjibana rhwembi, omuyankirire nk’oku wankanyankirira.

¹⁸ N’akabà akujirîre kubî, nîsi erhi akabà akubà omu mwenda, abage erhi nie oyîsh’idôsa.

¹⁹ Niene Paolo nkuyandikîre n’okuboko kwâni: nie nâkulyûle. Ntanarhama nakubwîra oku nâwe ondi omu mwenda, n’ogwo mwenda oli w’oyo wênene.

²⁰ Nêci, mwene wîrhu, onjirire okwo muli Nyakasane! Orhûlirize omurhima gwâni muli Kristu!

²¹ Nkuyandikîre n’obulangalire nti wanyumva, nnamanyire oku wajira ciru n’ebilushire ebi mpûnyire.

Akanwa kazinda, omusingo n’obwangà

²² Onteganyize n’ecirâlo, bulya ndangâlîre nti n’oburhabâle bw’ensengero zinyu nammugalulirwa.

²³ Epafra rhubà rhweshi babohe muli Kristu Yezu akulamusize,

²⁴ bo na Marko, Aristarko, Dema, na Luka, bo barhabâzi bâni.

²⁵ Enshôkano ya Nyakasane Yezu Kristu ebêre omu mirhima yinyu.