Ennanga 99 - BIBLIYA NTAGATIFU OMU MASHI

Nyamuzinda, Mwâmi mushinganyanya na Mutagatîfu

¹ Nyakasane ayîmire, amashanja gadwîrhe gageramwo ogwa nyegenye. Atamîre oku nyanya lya bakerubi: igulu lidwîrhe lyajuguma.

² Nyakasane arhabâ ntindi omu Siyoni, ye nakulîre amashanja goshi.

³ Izîno lyâge ligashâne, lirhali nshâhu balirhînye: liri litagatîfu.

⁴ Ye yîmire omuzibu osîma obushinganyanya, wafundisire ebinwa bishingânîne, muli Yakôbo obushinganyanya buli bwâwe, n’emmanja we zitwa.

⁵ Mulengeze Nyakasane Nnâmahanga wîrhu, mufukamirize aha cisinde ahirakwo amagulu: ciri citagatîfu.

⁶ Mûsa na Aroni bali omu badâhwa bâge, Samweli naye àli muli balya bàkazâgiyâkûza izîno lyâge. balya bàkazâgiyâkûza izîno lyâge naye anabayumvirhize.

⁷ Akazibashambâza anali omu nkingi y’ecitù: bakaziyumva amarhegeko gâge, bakaziyumva oku abarhegesire.

⁸ Yâgirwa Nnâmahanga wîrhu, mushâna wabayumvîrhîze, Nyamuzinda, mushâna wali obabêrîre obwonjo, ci bubî bwâbo bwarhumaga wacîhôla.

⁹ Mulengeze Nyakasane Nyamuzinda wîrhu, mufukamirize aha ntondo yâge ntagatîfu. Bulyâla Nyakasane Nyamuzinda wîrhu ali Mwimâna.