Ennanga 98 - BIBLIYA NTAGATIFU OMU MASHI

Nyakasane ayîmire, ahimîne, ali Mucîranuzi mwinjà

1 Lulanga.

¹ Lulanga. Yimbiri Nyakasane olwimbo luhyâhya, bulyâla ajizire ebirhangâzo. Kwamuhimire okuboko kwâge kulyo, okuboko kwâge kutagatîfu.

² Nyakasane amanyîsize oku kuciza aciza, omu masù g’ab’emahanga, afulûla obushinganyanya bwâge.

³ Akengêra obwinjà bwâge n’obudahemuka bwâge, kuli bene-Israheli. Igulu lyoshi aha litanga n’aha liramuka, lyabona okuciza kwa Nnâmahanga wîrhu.

⁴ Igulu lyoshi lihindire Nyakasane, musîme, munashagaluke, munazihe.

⁵ Muzihire Nyakasane enzenze, mudumûle enzenze mudumûle n’olulanga.

⁶ Oku orhurhêra rhwalongêra, oku empembe zabûhwa, muhinde, muhindire omu masù ga Nyakasane.

⁷ Enyanja ekunguze haguma n’ebiyirimwo, igulu lidumize haguma n’abalirimwo.

⁸ Enyîshi zikome akagasha, oku entondo zahinda.

⁹ Zihindire omu masù ga Nyakasane, bulyâla ayiruka, bulyâla ayishire alirhegeka igulu; ârhegeka igulu n’obushinganyanya, ârhegeka n’amashanja burhalyâlyanya.