Ennanga 95 - BIBLIYA NTAGATIFU OMU MASHI

Rhuyimbire Nyakasane n’omwîshingo

¹ Muyishe rhuhindire Nyakasane, rhuyakuze ibuye lyàrhucizagya.

² Rhujè omu masù gâge rhucîtakîriremwo, rhuyimbe rhunasâmiremwo.

³ Bulya nêci Nyamwagirwa ali Nyamuzinda mukulu, anali Mwâmi okulîre banyamuzinda boshi.

⁴ Enyenga z’en’igulu aha nfune yâge zibà, n’amasongêrwe g’entondo goshi gâge.

⁵ N’enyanja eri yâge: bulya yêne wayijiraga, n’idaho lyûmu nalyo lyâge: nfune zâge zàlibumbaga.

⁶ Muyishe rhuharâmye Nyakasane rhufukame embere zâge bulya ye warhulemaga.

⁷ Bulyâla ali Nnâmahanga wîrhu, nîrhu rhuli lubaga lw’irango lyâge, rhuli bibuzi bitundwa n’okuboko kwâge.

⁸ Murhakarhangiyumva izù lyâge ene: mukaliyumva murhazigaga emirhima yinyu yâgârha, nka kulya yàgârhaga e Meriba, nka kulya yàgârhaga e Masa omw’irungu olusiku lw’amashumi.

⁹ Lulya lusiku basho bangeramwo, bulyâla bantangulaga bànabwîne ebi nkola.

¹⁰ Myâka makumi anni yoshi erhi oburhè bw’eryôla iburha bungwêrhe, naderha obwo nti: «Omurhima gw’olu lubaga kuhabuka gunahabusire», nti: «Ciru barhishi enjira zâni oku zigenda.»

¹¹ Nacigasha muli obwo burhè, nti: «Barhâlabarhe omu iluhûkiro lyâni.»