Ennanga 84 - BIBLIYA NTAGATIFU OMU MASHI

Omwîfinjo gw’okuhika omu ka-Nyamuzinda

¹ Gwârhi omukulu w’abimbiza. Luyimbwa aka Gati. Lwa bene Korè. Lulanga.

² Alà nk’enyumpa yâwe yayinjiha Yâgirwa Nyakasane k’Emirhwe.

³ Omurhima gwâni gwafîre n’omwîfinjo gw’okuhika omu kônga ka Nyakasane. Omurhima gwâni n’amagala gâni bidwîrhe byalwîra okuhika aha burhambi bwa Nyamuzinda ozîne.

⁴ Ciru n’ehifunzi hijira aha mwahyo, n’ehirembe-rembe hijira olwôgo hidêkerezamwo ebyâna byahyo. Câhisibwa aha luhêro lwâwe Nyakasane k’emirhwe. Yâgirwa Nnâmahanga!

⁵ Câbajirwa ababà omu nyumpa yâwe Nyamwagirwa bolino barhahwa barhâkukuza.

⁶ Iragi lyâge omuntu orhabâlwa nâwe, amango agwêrhe omulâli gw’olugendo lutagatîfu.

⁷ Hano bayikira akabanda kûmu, bâkahindula nshôko, n’enkuba mpangûka ekabumbe mugisho.

⁸ Bâja bazibuha bunjirà-njirà bulya bâyîsh’ibona Nnâmahanga omu Siyoni.

⁹ Nyakasane k’emirhwe oyumve guno musengero gwâni, Nyamuzinda wa Yakôbo ontege nâni okurhwiri.

¹⁰ Nnâmahanga, we mpenzi yîrhu, rhulolekwo nîrhu, lolà oku busù bw’omushîge wâwe.

¹¹ Kwo binali: omulegerege omuntu agezize omu mwâwe gwo mukulu oku yindi cihumbi, okubêra aha lusò lwa Nnâmahanga, kwo kukulu aha kubêra omu nyumpa y’abanya-byâha.

¹² Nyakasane Nnâmahanga ye Kazûba-zûba ye na Mpenzi, oburhonyi n’irenge zo ngalo zâge. arhazijinikira, oku bantu bakerekera omu ntagoma.

¹³ Nyakasane k’emirhwe, iragi lyâge omuntu ôkwîkubagira.