Ennanga 75 - BIBLIYA NTAGATIFU OMU MASHI

Nyamuzinda Mucîranuzi w’okuli

¹ Gwârhi omukulu w’abimbiza. «Shukira orhashâbe». Lulanga. Lwa Azafi. Lwimbo.

² Kukuza kuno rhudwîrhe rhwakukuza, Nyakasane, kukuza kuno rhudwîrhe rhwakukuza. Rhudwîrhe rhwakuza izîno lyâwe, rhunadwîrhe rhwayimba ebisômerîne byâwe.

³ Amango nâtwa olusiku go na mango nâtwa olubanja niene; nk’oku binahashikîne.

⁴ Ciru igulu lyankadundagana, n’abaliyûbakakwo boshi badûndagana, amakondo gâlyo buzibu nagagwisire.

⁵ Nabwîzire abalimbirira, nti: «Murhalimbirire», n’enkola-maligo, nti: «Murharhege amahembe».

⁶ Nti: «Murharhege Ow’Enyanya amahembe, murhahiraga mukashinyagulira Nyamuzinda!»

⁷ Arhali yo âyîsh’ebushoshôkero bw’izûba, nîsi erhi ebuzikiro bwalyo; arhali yo âyîsh’ebwa ntondo,

⁸ Nyamuzinda ye mutwî w’emmanja: anayandagaze muguma, alengeze n’owundi.

⁹ Bulya Nyakasane akola afumbasire akabêhe, kayunjwîre irivayi lyabira, linali lya cigushè. Amâbahungulira kuli ko: enkola-maligo zibà okw’igulu, ene zanywa zishongôze.

¹⁰ Niehe nâyôrha nsîmire ensiku n’amango, nanzihire Nyamuzinda wa Yakôbo olulanga.

¹¹ Kutuntuma nâtuntuma amahembe g’enkola-maligo, amahembe g’abashinganyanya gohe kugôya nâgagôya.